Speed Dating奇遇記?!

【睇文前留意喇】
嚟緊2月26號有首次讀者聚會,等緊你嚟參加!
詳情請睇:goo.gl/lHXAeO,希望到時見到你 🙂

img_7789

每年情人節都會寫一篇關於感情嘅文章,唔好年年搞到咁傷感,不如今年輕鬆吓。好耐之前我曾經應承過寫一篇Speed Dating光怪陸離奇遇嘅文章,講講吓都唔記得咗,較早前有讀者提起「找數」,我決定不如等情人節寫嚟「應吓節」。

好多人覺得去Speed Dating好樣衰,但其實同你玩Happn同Tinder冇分別,只不過一個要俾錢一個(好大程度)唔駛俾錢咁解。或者有人會唔明點解要去呢啲嘢,好簡單,識到另一半原因,好多時不外乎「Friend疊Friend」,但我本身連Friend都冇乜,又何來「疊」到出嚟?有人可能會係返工識到,但我做親都係one-man team,從來冇拍檔又唔會有機會喺咩聚會上識到,所以,唔Speed Dating都冇乜可能識到另一半。

講話你去過Speed Dating,好多人慘過叫佢「出櫃」,其實冇乜大不了,第一次去果啲地方時,或者你都同我一樣有少少獵奇心態,會唔會有好多騎呢人?其實,正常人極多,靚仔靚女都有好多,只不過同我一樣正常圈子唔會識得到咩人。當然,有啲公司可能有「媒」去提升質素或湊夠人數,你講落都會聽得出,但「真正正常人」都有好多嘅。好喇,咁到底點玩法呢?去過幾間,一般公司都係廿幾人單對單咁坐,每人六至八分鐘俾你傾計,悶蛋者會講到好似見工咁,開心者都會傾得幾開心架。最後,你可以揀返想拎邊個聯絡資料,到最後如果佢又有揀你、你又有揀佢,咁就可以拎到大家資料,之後有咩下文就自己搞掂喇。

正常人確係有好多,但唔正常或者騎呢人都有好多,應承過分享,以下遇到呢一堆,真係講十世都仲難忘:

1. 飢渴大嬸
其實Speed Dating一般都有年齡組別,十幾歲、廿幾歲、三十幾歲、四十幾歲咁,但因為大部份公司都冇事前screen過,所以總會有好多唔同年齡人士入咗嚟。講真,再唔啱嘴型都係果幾分鐘,一般都會講埋去嘅。有一次,我撞正一個冇五十都四十歲嘅大媽。佢個如狼似虎嘅樣,我一世都記得,諗起都仲心驚驚。無論你講咩,佢都笑淫淫咁答「係呀係呀,你好犀利呀」,講講吓直頭話「其實你好正呀」,然後個頭仲要愈中愈埋。我好記得果個係牆角位,我幾乎俾佢「壁咚」到面貼面,仲要佢個口勁臭,我忍唔住講句:「阿小姐,麻煩你介唔介意坐返開少少呢?」

2. 花生少女
合則來不合則去,明白嘅,再加上有啲女仔好怕羞,你真係要不斷諗話題去引導佢講嘢。不過,既然俾咗錢,我都會好專業咁玩埋落去,都係果句,幾分鐘姐,「專業」少少啦。有一個就真係好老尷。話說初頭唔識玩,開場白都係離不開返咩工呀、有咩興趣呀之類,咁遇到有個女仔就話自己研究花生,我差啲以為自己聽錯,但佢堅持話自己係研究花生,大概係做食物監控之類?我估?聽落幾有趣,我就繼續問啦:
「好似幾得意喎!份工主要做啲咩架?」
「嗯,研究花生。」
「除咗研究花生呢?」
「嗯,研究花生。」
「…咁你平時有咩興趣?」
「冇乜。」
「咁你放假通常會做啲咩呀?」
「冇呀,我好宅,通常喺屋企」
「…丫,哈!咁不如等我介紹吓自己啦!」(然後自吹五分鐘)

3. 悶蛋司機
去得呢啲嘢,通常都會包野食同一杯嘢飲,我頭幾次真係以為杯嘢係俾你解渴,原來有另一用途。話說我同對面個女仔傾得興起時,聽到旁邊個男人不斷發出「索索聲」,係擺到明杯檸茶飲到冇曬水嘅聲。咁講啦,旁邊果兩位同性參加者,因為跟住你同一方向移動,所以基本上你會聽到曬佢講乜,我大致都聽到佢係個中港貨櫃車司機,其實都有唔少趣聞同故事分享,但似乎唔多識表達自己同尷尬。如是者,佢對住個又係「dead dead哋」嘅女仔,就完全dead air,要用杯檸茶扮飲嘢去化解尷尬。最後,我聽佢「索」到都有少少尷尬,終於旁邊個女仔伸個頭埋嚟:「唔好意思呀,我呢邊幾悶,你介唔介意我join你哋話題?」個男嘅塊面紅到呢。

4. 鬥氣冤家
有時聽旁邊嘅人講嘢,真係好有娛樂性。好多人唔知講乜好就會「借尿遁」,所以不斷會聽到身邊有人係咁去廁所,但最爆笑嘅係,有一次旁邊果個男仔自稱係做銀行之類,個個女仔都係咁吹自己賺幾多錢,覺得自己好威咁。根據咁多次經驗,呢種吹自己好有錢嘅人,並唔代表女仔一定對佢有興趣。對上一個女仔,係一個花枝招展、信心爆棚嘅女仔,我就真係唔係好啱,都溝通唔到,點知到個男仔一坐低,佢竟然話:「我覺得你唔係好啱我,不如算啦!」然後就拎部手機出嚟篤,呢個行為擺明落咗個女仔面:「吓,我覺得自己好靚囉!」我已經好想笑,個男仔望佢一眼:「靚又點?冇興趣無謂嘥口水囉,同埋我唔覺得你靚囉!」個女仔即刻著咗:「喂,你咩態度呀,尊重吓人好喎!」之後果幾分鐘都係嗌交,其實我覺得佢哋好夾,而且實在太好笑。

5. 900蚊港女
去Speed Dating果筆錢未必貴,但係「後續消費」就貴。既然大家都對對方有興趣,自然會約出嚟行街食飯睇戲睇吓啱唔啱啦。話說有一次約咗個女仔七點食飯,佢自稱喺商場樓上商廈六點半放工,點知搵極搵唔到佢,結果我等到佢七點半先出現,冇原因冇道歉,第一句:「點呀,有位未呀?」已令我有少少反感。
約佢之前,已經俾咗一堆餐廳佢揀,佢就偏要揀間最貴嘅,咁冇所謂啦,又係我叫人揀。點餐時,擺明揀盡全餐牌最貴嘅嘢嚟嗌,嗌完仲要唔夠喉,幾乎叫曬成張餐牌甜品再加cocktail,結果,係食唔曬嘅。其實果餐飯已經知道大家都冇興趣,係冇興趣到唔會再見果隻,咁但係埋單都gentleman風度我俾錢先,嘩,埋單成900幾蚊,真係唔知做乜要食咁貴。
點知,佢叫到最貴又食唔曬,仲冇打算俾錢。講真,「後續約會」好多時都係AA制,再唔係初次見面百幾二百蚊請都冇所謂,但一人四百幾蚊我真係覺得OVER咗。一直送到佢去地鐵站,再樣衰都要講:「頭先果餐…」好在佢都醒目,但又真係好嬲咁講:「吓要俾架?俾返你囉!」然後塞咗300蚊俾我頭也不回。
我想講,唔夠囉。

當然,呢類活動唔止有怪人,男嘅有「食家」、女嘅都有唔少「觀音」,更加有唔少係嚟sell嘢,但都有好多正常人,當然都有好女仔,做唔成情人,最後做到朋友,喺呢啲活動都識到唔少嘅。曾經有一段時間好強求想有一段關係,結果狂去,去到自己都覺得累,始終你一晚重覆同一段對話廿幾歲都幾累兼幾悶,而後續不斷要認識一個人,你會搞到個人好累,冇興趣就係冇興趣,而對方對你有興趣,但你識落都係冇興趣時,最後都搵自己嚟搞。所以,隨緣啦,有機會可能會再去,但唔會刻意不斷狂俾錢去追求嚕。

都係果句啦,好多嘢得來不易,唔好覺得好多嘢輕鬆得到就唔識去珍惜,其實只要你領會過呢種跌跌撞撞嘅過程,就自會識得去珍惜。當然,諗返呢啲經歷好似得啖笑,但都係好好嘅人生經驗嚟嘅。

點都好,有情人冇情人都好,祝大家情人節快樂!

【延伸閱讀】你找到「過電」的一刻嗎?

【延伸閱讀】如果有多一張機票,你願意跟我一起飛嗎?

更多資訊及文章,請Like Fb Page:
【有故事的旅人】

【晞。觀影記事】

IG請Follow:
#travelerwithmovie

廣告

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s