【睇文前留意喇】

🗿🇨🇱🇧🇴🇵🇪🇨🇴🗿
第11場分享會即將舉行，9月1號約定你！詳情：goo.gl/VnjVmc

其實我好驚大城市啲hostel，遇親九成唔係癡線佬就係party guy/ girl，一係毒撚戇鳩鳩喺房訓幾日唔知做乜。但喺哥倫比亞真係周街都識到人，而且個個正常兼friendly。

南美好多團都要有一定人數先出到，結果大家都要周街搵人湊人數。喺hostel個bar搭訕join團失敗，反而因此識到一班人。由點解只有西方男配亞洲妹、從冇（少）見西方女配亞洲仔（sosad），到意粉點整最好味，到德國人點解咁多假、華人點解咁鍾意鴨仔團、到我話香港年假平均得十日係咪講大話－－佢哋死都唔信，覺得我吹水，話如果年假得十日你哋覺得冇問題唔去示威遊行係你抵死（so99sad），再到必備嘅玻利維亞中伏事件，呢啲文化衝突永遠都係最正話題。

當中，冇諗過人生會識到一個索馬里人，話你知海盜問題唔係新聞講咁樣，抹黑典型化一個地方手法正如北韓咁。或者佢係當地人有少少偏幫自己人，但新聞講嘅嘢係咪一定持平？

我唔可以話哥倫比亞係最正，因為真係好熱好熱。去咗嘅幾個國家，我始終最愛智利，但呢個幾星期識到嘅人同事、呢度嘅慢節奏，我只可以話，我唔捨得走同一定會返嚟。

當中，我最羡慕你哋成班唔係「旅行」，係「生活」。你覺得我去兩個月南美好癡線，同時人哋都覺得你好癡線，唔係話你去咁耐，係邊有人去南美去咁短？兩個月一個國家都去唔曬啦。我唔可以話全部，但識親八成嚟到南美，最少都係去一年至年半。佢哋唔係hea唔係百無了賴咁飲酒開Party唔係周圍玩，甚至去嘅地方仲少過我，因為佢哋係真正咁「生活」。

大家都係咁上下年紀，廿到尾三十歲頭，但西方人唔會同你講三十歲要穩定，反而係去異國一年半載，學西班牙文、學跳舞、學整南美菜，gap一年兩年唔係廢青（中），係活得更精彩。

我哋如果辭職去一個月旅行，喺僱主眼中係十惡不赦嘅人，去一年半載你一係一生從此玩完，一係你嘅人生要重頭來過。但，佢哋唔係，去完一年兩年（唔係半載），佢哋嘅經歷係有用，或者利用自己見聞去搞生意，或者單係寫返旅遊故事已經可以衣食無憂（識到幾個外國旅遊blogger真心覺得香港做呢行有幾咁乞衣，呢一點遲吓再分享），仲喺僱主眼中會加分，甚至係俾你停薪留職去闖蕩，因為僱主覺得，咁樣先可以留住一個好員工，有見識有經歷先係成大事嘅人，而唔係讀十萬個學位就掂。

假期呢樣嘢，西方人會覺得自己年假得六七星期好唔人道，喂大佬我去個婚禮都搞幾日，飛一飛都冇咗兩星期啦，但原來我哋七日都係合法，硬係會覺得匪夷所思，點解呢啲公司、呢個社會可以留得住人？我好難同佢哋解釋，當成個社會、成個文化都係咁時，呢一個問題就已經唔係問題，當然，我都唔講OT冇補水、有十日假都未必俾你連住放呢啲咁癡線文化。

最諷刺嘅係，我哋搵餐廳時，索馬里朋友話唔好俾我揀，因為我係香港人，香港人喺佢哋之中係最有錢嘅一個。原來，佢哋係咁諗，因為知道香港物價全球數一數二，一定好有錢啦！我話，癡線，喺你哋成班歐洲人之中，我哋幾乎係第三世界國家。再講落先知，佢哋知道日本人係Work machine、Work slave，從冇諗過香港都係咁，以為我哋同歐洲一樣，生活比較輕鬆、人工都好高。

我哋好驚訝點解西方人好似乜都識，連啲唔知咩小國嘅天文地理風土人情都咁熟、一個國家有乜世界之最隨口都講得出時，佢哋唔係因為讀過好多個學位、飽閱群書，甚至分分鐘大學學位都冇個，正因為佢哋真正喺果個地方生活過、旅居過，自自然然就會有所認識，但對於亞洲人嚟講，一個小國邊度係首都、果個地方曾經發生過咩事、南美菜到底點整出嚟，Who fucking care？呢啲嘢幫到你搵錢咩？幫唔到呀，幫唔到做咩要浪費時間去知去學？

同佢哋傾得多計，係可以擴闊到眼界，但傾得愈多愈覺得自己生活嘅地方有問題而無能挽救同改變，再加上佢哋覺得你講嘅「真實生活」係誇張係吹水時，傾傾吓都幾無奈。

當然，我知道，呢度有啲朋友，可能都會覺得我以上講嘅嘢係吹水。

當然，我都知道，我以上講嘅「西方人」係exclude美國的，I (we) know that feeling bro.

每一次識到一班新朋友，佢哋原來已經住咗一兩個月，而我一兩日後就要轉地方時，除咗唔捨得，我都喺度諗，點解我哋要咁樣「去旅行」法？

【延伸閱讀】外國人點睇我哋假期系列：又一句is that even fucking legal?

【延伸閱讀】How long is your trip?