當你入咗沙漠但一滴水都冇時，真正見證到絕境嘅人性光輝

其實我好想Keep住日日update，但南美Hostel WiFi之流，唔係你話up就up，亦由於每個地方要準備嘅嘢都比其他地方多，都未必咁得閒每晚打篇長文。

所以，轉個頭我已經嚟咗智利北部旅遊重鎮AtacamaDesert，我諗呢度好多讀者都嚟過，只要你有去秘魯+玻利維亞+智利，應該冇可能唔到呢度。嚟得呢度，大家都一定會去Valle de la Luna。嚟呢度可以跟團，但其實踩單車入去時間仲好就，所以我同好多外國人一樣，租單車入去睇日落，只需CLP$3,000（約HK$40）半日，但跟半日團要五倍價錢，約CLP$15,000。

話說我喺復活節島賴過嘢後，今日買咗支2L水踩單車入去。好在少少陰天，冇復活節島咁熱。租車公司都話我好彩，如果烈日當空，踩入去都幾熱。我覺得OK，所以都冇乜休息，直至我爬完第一個checkpoint，發現今次仆街了，支水唔知喺邊漏咗。

向前行仲有幾公里就到終點，應該要上斜，返去拎水近20公里，俾你，你會點做？

我決定頂硬上，向前行。

點知，突然出太陽。我嘗試控制自己唔好喘氣、慢慢踩，但唔掂，個半鐘後，好口渴。

中途上座山，見人人拎住支水，我好想問，可唔可以俾我飲一啖，但覺得好odd冇問。點知行完座山，唔掂，口唇都乾埋，大佬沙漠嚟！落到停車場，我覺得再唔飲水，我一定捱唔到返去。點知停車場一個人都冇，我決定逐架車搵，終於見到有架車有人，我忍唔住，樣衰都要問，敲車門google translate問個司機。

有個伯伯乘客大概係唔想行山喺車度等，諗都冇諗俾我，我正想問佢幾錢，點知佢一嘢話free for you! 喺呢個moment你收我一舊水港紙我都俾，佢竟然話：no need, good luck young man!

感咗個動，除咗無限句Gracias兼同佢握手，我都唔知可以講啲乜，我冇諗過自己會因為一支水咁樣去r法，肚餓可以頂，口渴你真係冇得死頂。

因為好衰唔衰牙痛，痛到個口合唔埋，水份蒸發得好快，咁細支水其實捱唔到我返去，慳住慳住逐口飲，勉強得。

點知一波未平一波又起，仆街！租車俾果支頭燈踩到一半冇電。喺伸手不見五指沙漠（今晚月光都冇）真係靠遠處車啲燈去引路，好似當年澳洲買唔起頭燈日日放工摸黑踩單車咁（冇燈喺highway過迴旋處諗起都癲），但呢度唔同，啲路冇鋪，一片漆黑避唔切突然有篤沙喺前面，終於炒咗次車。

咁就更仆街了，入夜勁凍又得返一口水，牙又痛，炒完車手又痛腳又痛（一片漆黑我唔知點洗傷口），死頂踩埋果十幾廿公里，見到Hostel果下我真係百感交集到呢。

其實，南美大家講到咁恐怖（Touchwood so far唔覺），我周不時都有Check下貴重物品，但水真係唔覺唔覺就唔知幾時放低咗（呢度唔係歐洲或日本，旅遊點唔好話有紀念品店，連汽水機都唔會有），自此之後又要留意多一樣嘢。

不過，呢次意外，真係深深體會到人間溫暖。