7月22日:當挪威不再挪威:Paul Greengrass實況式慘劇重現

7月22日:當挪威不再挪威 NETFLIX 影評

英文片名:July 22

 

當年澳門影展睇完《恐襲夏令營》,用一鏡直落方式講挪威恐襲,我諗可能係一生睇過最震撼電影之一,當日睇完震撼到睇完返到酒店都久久不能釋懷。有讀者朋友已經推薦要睇呢套,但因為《恐襲夏令營》實在太真實太沉重,《7月22日:當挪威不再挪威》仲要喺Netflix長達兩個半鐘,一直都遲遲冇開嚟睇。終於,又去到一個已經睇無可睇、每一日都已經唔知可以做咩嘅地步,不如開嚟睇,話曬都有Paul Greengrass嘅導筒。

 

兩套戲背景都係一樣,重現返2011年挪威夏令營嘅恐襲,槍手喺島上向一班學生無差別襲擊,同時又喺市中心放炸彈,導致77人死亡,成為二戰之後歐洲最大型嘅襲擊。同《恐襲夏令營》唔同嘅係,呢套並唔係單純用恐襲果時學生嘅視點出發,雖然都有重現返恐襲,喺Paul Greengrass一貫嘅實感鏡頭下,即使未到《恐襲夏令營》咁一鏡直落,恐襲果場依然超有實感。又或者講,《恐襲夏令營》用到一鏡直落咁玩法,係就係有實感,但正正因為太有實感,都被抨擊點解要將悲劇娛樂化俾觀眾「體驗」,確係無可厚非。《7月22日:當挪威不再挪威》用返比較有電影感、第三身嘅方向去講個故事,再由唔同視點出發,取態上冇咁實驗性,都將「娛樂性」減低。

 

最大分別就係講恐襲之後發生嘅事。《恐襲夏令營》女主角獲救離個島就完咗,《7月22日:當挪威不再挪威》就繼續講落去。一單恐襲點樣令倖存者有一生不能磨滅嘅陰霾、殺人犯又有咩政治狂熱,以至佢嘅辯護律師、受害者家人、政府都有一定描繪,繼續配埋Paul Greengrass實感式鏡頭,聚焦住一班受害者嘅容貌、殺人犯嘅狂妄樣,睇果時的確係幾不安。上星期睇《以公義之名》講司法制度嘅不公義,但喺呢件事上面,應該冇咩人會支持呢位狂人,甚至連辯護律師都睇唔起佢,就算幾壓抑都好,睇到最後都係有少少釋懷嘅。

 

Paul Greengrass擅長將一件複雜嘅事拆解,再將佢用紀實式拍法拍到緊張刺激,無論係虛構嘅《叛諜追擊》系列,真人真事嘅《叛逆諜戰》《盜海追擊》、《聯合93》等等,都可以搞到有聲有色,用呢個心態去睇《7月22日:當挪威不再挪威》就差咗少少。

 

唔知係咪Netflix早期作品關係,製作上冇如今拍得好大型,都唔應該將件事娛樂化。前半段講恐襲、恐襲後嘅亂局,完全係Paul Greengrass敘事嘅拿手好戲,之但係後半段講角色之間嘅關係、內心世界,似乎就唔係佢強項,都一如《結叛同謀》咁拍得有少少冗長,都冇必要長達兩個半鐘。始終件事唔止係《聯合93》,就咁重現返件慘案,涉及到審判、多個角色嘅立場,令《7月22日:當挪威不再挪威》拍嚟好似顧此失彼,每個角色都講啲咁,仲有反派立場太過敏感,都唔可以好深層咁探討呢個人嘅故事,變咗後半段講倖存者重生同審判情節,好似搞咗個幾鐘後,都係平平淡淡、意料之內咁收場。喺《恐襲夏令營》珠玉在前下,呢套對比起嚟係有啲失望。

文字工作者也得要吃飯,你的支持是我寫下去的原動力。請給點心意,給小弟走更遠的路,寫更多好文章,歡迎透過以下QR Code課金以作支持:
75486099_723429001505181_3402665167123644416_n
同時,你也可透過Payme link:https://payme.hsbc/jackyhei
或Paypal捐款:paypal.me/jackyhei

如果最近你真係情緒太低落太壓抑,呢套仲沉重過《以公義之名》、後半段都唔係話好似Paul Greengrass往作節奏咁明快,都要有心理準備唔易入口。當然,你話點解挪威人成套戲都講英文,呢啲就無謂拗啦。

【最新旅遊文章】【西貢行山】白沙澳經荔枝莊到深涌草原,雞麻峒睹地質公園美景!

【最新旅遊文章】【西貢行山】高流灣經狐狸叫至東龍二輋,賞蚺蛇尖雄奇景色!

如若喜歡本人文章想作定期支持,請即訂閱Patreon加強版,不定期精選深度獨家電影文章及尊享優惠,請即訂閱:https://bit.ly/2TS6BiE

✨電影網店現已開幕,多款電影海報、電影精品低至$5起,快啲嚟睇啦:https://bit.ly/3qLPkpk

 

感謝各位支持,小弟執筆之原創小說,私人貨存已全部售罄,有意者繼續可到此文章內的連結購買!

 

更多資訊及文章,請Like Fb Page:
【有故事的旅人】
【晞。觀影記事】
MeWe: travelerwithmovie

發表迴響