英文劇名：I am Groot
Marvel同Disney+繼《無限可能：假如》後第二套動畫，搵嚟MCU超人氣嘅樹人BB做個獨立故事，而時間線就係緊接《銀河守護隊》之後。不過，你唔好期望同MCU有乜關係，又或者喺Marvel版圖上有咩推進。事關成季得五集，每集減頭減尾大約得三分鐘，亦即《我是樹人》成季得大約15分鐘，睇唔出可以同MCU有乜關係，只睇得出Disney merchandise又有多幾款，所以，我都寫唔到長文，就咁短評算。
近期Marvel無論電影定劇集都伏伏地，不如還原基本步，唔好諗咁多，《我是樹人》就咁俾五個冇乜內容嘅故事你賣下萌，應該好快成為熱門MEME圖，俾Marvel抖返啖氣先。故事講述樹人喺第一集《銀河守護隊》後重生嘅冒險故事，睇住佢喺飛船同唔同星球度搞事，當然唔少得大量表情包去搞笑，如果想輕輕鬆鬆咁睇套短劇笑下，《我是樹人》絕對可以滿足你要求，感覺好治癒，都係記憶中樹人史上最多對白嘅一次，佢性格同造型大致上都係跟返《銀河守護隊2》嘅。
如果要求賣萌，個人最鍾意佢沖涼沖到出葉同迷你英雄兩集，後者大量表情包，十級可愛！不過，之前Marvel幕後特技製作人出嚟插爆單嘢，似乎都應用到呢套劇上，最後Rocket出場好似未完成生硬動畫人物咁。
我好殘忍咁帶大家返返現實，當大家瘋狂咁J Baby Groot有幾可愛時，唔好唔記得幕後功臣係邊個…
