【睇文前留意喇】
晞。觀影記事16週年聚會 x 中南美分享會即將舉行，詳情請即按此，期待能見到你！
作為一個鍾意世界各地行山嘅人，智利嘅Torres del Paine（百內國家公園）一直係我Bucket list，五年前冬天嚟到封咗山，成為智利之行遺憾，今次再嚟南美，就係我First priority，都成為一大重點。嚟得阿根廷，點都要過一過智利行埋。就算阿根廷行程零planing，呢度我點都係放第一位；心知道開山就嚟會冰天雪地，但我冇諗過咁癲。出發果時正值剛剛開山，以為開得山已經好安全（時為2023年9月中），其實唔係，好多地方依然鋪滿積雪，半途你冇得唔行，只好頂硬上，都俾咗我好難忘嘅經歷。
試過行雪地、試過行夜山、試過揹全身gear行山，但未試過三樣嘢一齊做，仲要上埋冰爪果隻。自問有大量行山經驗，呢五日四夜都係人生極限。
百感交集，呢五日經歷幾乎可以出到一本書，喺行程同傳統交通方法、行山路線以外，都想記低最深刻嘅嘢——我喺呢五日遇到嘅驚險事同得著，重點係當中好人好事，幾乎係成個大半年行程最深刻位置。
Part 1：百內國家公園得注意且最深刻的10件事
1. 冬天行山難度倍增
知道成條路會鋪雪，有雪唔係問題，之前都行過雪山，上咗冰爪都還可以，問題係好多段路係90度直落。結咗冰嘅瀑布有冰爪都冇用，勁跣，成功挑戰到、學識點樣冰面用力，人生成就解鎖。
2. 勁fake嘅時間
行山有預計行程時間是常識吧，一般都係以體力中下時間講，因此如香港行山官方時間，隨時可以減半，諗住呢度都係咁就瀨嘢。佢同你講3個半鐘到，就算途中遇到近乎跑山嘅旅者，都要五個鐘先到，雪地之下當然更會慢，最後接近七個鐘先到。然後瀨過嘢，就要晚晚天未光出發。
3. fake唔緊要，更慘係浪費體力
每個人嚟到呢度，都一定會去上圖嘅「百內塔」。百內塔最後果800米極難行，上落來回雪地要幾個鐘，於是Park ranger下午兩點封山。問題係，當你搭第一班巴士去到base嘅住處，放低行李出發已經十點，要行最少四個鐘先去到最後800米。但係，佢一直冇任何指示，入口都冇講明兩點鐘會收，直至去到山腰Chileno先會有個告示。每個遇到嘅人，都以為兩點前過到Chileno個位就得，點知再行多個幾鐘，先同你講兩點鐘封山。如是者，你攀山涉水行咗四個幾鐘，終點在望喇，佢要你行返四個幾鐘返轉頭，個個粗口橫飛都冇用，結果，我哋來回行咗接近九個鐘，唔知為乜。果種絕望同挫敗感，一生難忘，回歸嘅大家隨咗粗口都係粗口。講真你要人安全絕對明白，但唔該出發前講明、有標示，唔好浪費大家體力，仲要明知冇可能去到，都叫你出發。
4. 一日行22個鐘
嚟得冇理由唔去，咁百內塔朝早七點開山，我哋決定凌晨三點出發，然後再駁另一條Trail去下個住處。初時唔知時間亂嚟，信佢行去下一個住處係六個零鐘，正路九點就到。點知條路冇任何標示、GPS又失靈，結果行錯路、行咗接近十個鐘先到，去到住處已經接近凌晨一點；以為自己柒咗，原來遇到其他人都一樣行錯，仲要係同一條路。
5. 人生最有死亡恐懼一次行山
呢段深山經歷就成為一個恐怖夢魘。自己唔係冇試過行山蕩失路，都唔係冇試過行夜山，但兩樣一齊再加埋Patagonia式天氣就好恐怖，直頭覺得自己會死。行過Torres del Paine嘅人都知道可以一日經歷四季，聽到超越十號風球風速喺你身邊掠過——如果香港極限係十號風球，我經歷嘅係二十號風球威力、近乎海嘯式嘅巨浪、每步你唔知有幾深嘅雪路、近乎70度嘅斜路，堅恐怖，最終只可以靠地形、靠月光引路，當你知道終點在望、自己冇行錯，果種激動難以言喻。
6. 水能載舟亦能覆舟
我好深體會到呢句說話。喺GPS失靈下，河流就係最好辨認方法，沿住河行一定冇錯、行山地圖最易locate到自己位置，都係河流；每次聽到河水聲都好開心。同時，個問題係，當狂風吹落條河而你要涉水過，無論係朝早定夜晚都唔講得笑，行過湖邊直頭覺得巨浪會撲埋嚟咁；半夜零下十幾度，流水隨時結冰，一個唔覺意踩到用錯力，有冰爪都跣死你。
7. 好多謝大自然嘅看顧
雖然天氣好惡劣，都經歷過最典型Torres del Paine風速，好感激係最惡劣環境時天氣都未至於好差，每一個景點都好好天。每次行山都會深感每一舊踏足嘅石、每一棵扶你上路嘅樹枝，以至係你筋疲力盡遇到可以坐低嘅一棵樹幹，都係大自然俾你嘅禮物，我唔止一次對住啲樹同石講句多謝。出發前，我只帶一枝行山杖，冇諗過一枝係唔夠用，特別感激撐我行落去嘅幾枝樹枝，辛苦了。
係，個個都拎到引路路標去行，因為夠實夠借力，呢支亂石沖落水中執到嘅路標，幫到我好多，最後我都插返去個當眼位置，希望幫到人。
8. 最美風景係人
個個嚟到都係五日四夜，每一日你基本上都係遇到同一班人，大家去同一個方向、都會知道大家行程，甚至見唔到某某會覺得擔心。
好多謝摸黑最後一公里幫我哋遠處打燈引路嘅人，真真正正係一點希望之光，從來冇諗見到有人氣嘅光咁感動、好多謝冰爪甩咗幫我哋執返嘅法國同房、好多謝半夜三更冰天雪地帶我哋去搵campsite嘅智利遊客、好多謝最後成功完成W trek同我哋鼓勵歡呼嘅法國同瑞士情侶，仲要多謝好多素未謀面，但喺雪路mark指示嘅行山者。仲有，以上所有人以為成功逃出公園，點知最後一刻大風大雨、冇巴士被困廁所避難、一齊「打邊爐」捱過場暴風嘅每一位。下面會詳細分享。
呢幾日，大家都有相同體驗，每個蕩失路經歷、每個俾錯標示同Park ranger fake嘅故事（呢度Park ranger同山屋員工真係可以將遊客推向死亡邊緣，呢個稍後再分享）；絕境關頭遇到每位互相鼓勵、堅持撐落去嘅人，每一句you can make it、每一句good luck、成鞋成褲都係泥漿同雪嘅經歷，都交織出呢個地方最靚風景圖。
9. 世上最完美嘅風景
事前睇好多文章都形容呢度係世上最靚地方，係咪「世上最靚」我唔敢講，但一定係我人生top 3，過程係好辛苦，每個景點都不枉此行；睇到一個個世界知名嘅景色，感動到有少少眼濕濕。我唔會話enjoy，呢五日真係太痛苦，只能話既係行程highlight，都係旅遊人生一大高潮。可能好多人會覺得攞苦嚟辛，但無論終點嘅風景定每個意外、遇到嘅好人好事，都係無價。
10. You are not alone
除咗不斷遇到「同病相憐」嘅遊客，最深刻亦唔係一個人行。自問一個人行過世上好多最癡線最癲嘅山，亦唔止一次冇GPS靠自己對山勢同日月經驗搵路，但，並唔係極端天氣到咁。喺係最絕境關頭，完全係你睇戲去到就暈、好想放棄果一種——你身體已經支撐唔到，精神就不斷叫你要頂落去、就到。唔係放閃，你見到女朋友都就嚟頂唔住，你再頂唔順都要不斷相信「就到」、鼓勵埋佢一份，好彩有女朋友喺我累到就崩潰時幫手搵路，兼且相信我每一個決定（其實黑媽媽，真係直覺方向感做人），先可以一次又一次完成目標。
見到好多人冇乜裝備行到一仆一碌，甚至中途頂唔順要回頭。真心呢個地方唔係家樂徑、柴娃娃可以去行幾日，講緊要有一定體力、認路、行山技術先好去。聽完咁多人故事，呢個公園Park ranger同設計都勁流，雖然係全球知名景點，員工態度加埋不知所謂指示，都係全球難得一見。如果冇返咁上下經驗，唔好信佢哋有咩事幫到你，真正收咗你錢理得你死，即使明知環境極差都會叫你唔駛冰爪同行山杖都照去，建議你跟行山團入。
再三再三提醒，如果要去百內塔（以冬季情況講），你14:00前要去到最後800米個位，唔係Chileno trail口，亦即你最遲13:00要喺Chileno出發。就算俾你上到去，佢15:00會趕人走。我遇到對瑞士情侶，14:10去到最後800米，求Park ranger俾佢上去，結果跑到上去影冇15分鐘就要回頭。如果你10:00出發，建議你用最快速度，唔好抖唔好諗唔好食嘢，一嘢衝咗上去先，要影相要食Lunch，落嚟再算。
至於我哋呢五日遇上咩事？請繼續睇落去…
Part 2：在百內國家公園絕境一刻遇上超越好人嘅好人——我哋突然成為傳奇大紅人？
如前面所講，百內國家公園行山，最難忘之一係好人好事，喺Torres del Paine每日都遇到唔同驚喜嘅人同事，好慶幸每次喺絕境關頭，都會遇到有人救你一命，冇諗過，我哋因此成為咗五日四夜呢班人入面一個榜樣，仲係大紅人，都因此認識咗個超級大好人。事緣就係一連串錯誤連鎖效應。為咗令大家更清楚理解我路線，都附上當地地圖：
話說我哋第一日上唔到「百內塔」（Base Los Torres Lookout），就決定第二朝出發。如果信官方地圖，我哋行三十幾公里、14個鐘就可以完成——當然，Torres del Paine地圖時間同距離冇幅一樣、Park ranger同山屋員工都以Fake你為樂，我之後當然知道，但果刻唔知。預計凌晨三點出發，連埋休息同食lunch時間，應該可以由Central上到百內塔，再落返下一站Frances campsite。就咁睇，由Central去Frances果段都係海邊，應該就唔難行。
我冇諗過，呢個咁癲決定，係惡夢之始。
首先，你由Central來回百內塔，講緊係結冰路咁行，已冇咗半條人命，結果我哋下午三點先去到Central同Frances個分界位。路途上，每個人見我哋咁做，都露出驚訝神情，表示「Good luck」、「Safe trip」 ，有啲人被「他媽的兩點收Trail」擊敗咗唔再上、有啲人就喺中間Chileno campsite抖一晚，得我哋再次來回咁癲直踩。
如果佢個時間同路途係啱，我三點出發，理論上九點就會去Frances campsite，但佢所有指示都係假，再加埋Central去Frances一段路況極不清晰、GPS都失靈，單靠地形同月色，點都會行錯路，甚至係不斷同一個位係咁兜。我唔知自己入咗結界定點，果段路完全唔知發生咩事，行咗半個鐘後都喺同一個位。結果，不斷見到中間個Cuernos campsite指示，但行極都去唔到。最後，差唔多九點半先去到Cuernos，仲要多個半鐘先到Frances。果時，我已經筋疲力盡，行山接近行咗廿個鐘。
係，條路係冇錯，但Torres del Paine嘅Trail設計，就係有大量極無意義嘅上上落落，個半鐘嘅路佢唔係沿海邊行，無啦啦入內陸，再有急上急落設計、入夜後路又再一次結冰，最終我哋行咗超過三個鐘，接近一點先到Frances。
最初，我一直都諗，登記曬又有紀錄、酒店之間又有聯絡，我Book個campsite都唔平喎，仆你個街成千蚊喎，如果有咩事蕩失路，應該點都有人會嚟救你？
諗多咗喇，當你辛辛苦苦捱到去campsite，已經一片漆黑，唔會有人等你；一般late check-in都會reception留低字條俾你，話你知住邊，呢度繼承玩死遊客宗旨，咩都冇、閘都落埋，你以為有人會救你？唔好咁天真，你死咗都冇人知。
然後，我見到有光，即刻大叫：Hola! Alguien esta aqui? （Hello! Someone is here?）佢見到我即行返轉頭，我係咁同佢講想Check-in，點知佢答我係遊客，只係去廁所見到我有燈就睇下有咩幫手。佢都好無奈，事關佢九點想買枝嘢飲，先發現餐廳收咗、Reception都收埋，佢話，冇辦法，呢度全部人已經訓曬，no one will care about you.
當你捱咗22個鐘只想休息時，聽到呢個消息都咪話唔崩潰。
點知，呢個智利遊客竟然超好人，幫我哋四圍搵員工，又帶我哋去廁所、廚房等地方。行行下仲話，因為佢個妹識咗個朋友，對方朋友甩底有多張床，所以佢妹可以住房；如果我哋最後搞唔掂，可以俾佢個tent我哋訓，佢入阿妹房訓地下。我初時以為智利仔有咩陰謀，原來佢真係超好人到一個點冇任何惡意，純粹見我哋咁樣、出於好意，俾個camp我哋訓。
智利遊客覺得，每個人相遇都係緣份，今日絕境幫我哋，可能聽日到佢有事，又會有人幫佢。佢相信因果報應，做好事自然有回報。
好人到咁，我唔知俾咩反應佢。由於太難想像可以好人到咁，我都先婉拒，總可以搵到辨法訓嘅。我哋搵搵吓搵到去員工宿舍，我相信係希望喇，都唔好意思阻人咁耐，智利仔竟然超好人：唔緊要，我可以等你、真係搵唔到住，可以俾個camp我哋。
講緊果時係零下14度，佢只係去痾夜尿，得薄薄嘅衫，竟然同我哋等。
我搵到個員工，員工竟然話，我記得你booking個名，不過九點後嚟唔到，我就唔理架喇，你見有吉camp就自己爆入去訓啦，理論上就有，冇都冇辦法，然後頭也不回關門。
乜撚嘢呀你老味？我屌，成千蚊晚住個camp，可以咁態度。
行返轉頭，以為智利仔走咗，點知佢仲喺度，話擔心我哋搵唔到人，再次重申可以俾個camp我哋，please accept my treat。
果時已經接近兩點，我行咗23個鐘冇訓，開始個腦function唔到，心諗都係唔好堅持、搵唔到都要訓，唔通零下十幾度，冇遮冇掩訓山？點知，智利仔好心到陪我哋一齊搵camp、做埋campsite職員份工，幫我哋搵到個camp，肯定我哋冇事，先肯離開訓覺。
我累到唔知自己訓過覺，第二日一起身已經九點半，我好想同智利仔講聲多謝、影張相，但佢已經走咗。
喺呢度行，就係不斷會遇到同一班人，最後我哋上法國谷途中遇返佢，我都未開口，佢已超熱情咁問我哋訓得好唔好、職員有冇再理我哋，有冇睇自己有冇受傷？仲好熱情同我擁抱，果下真心覺得人間溫暖，收你巨額住宿費嘅職員當你冇到，佢竟然仲熱心過職員。
同佢道別之後，喺去Lago Grey途中又遇到佢，竟然玩即日來回。我遇到佢果時已經下午四點，我好驚訝有冇可能呀，行返轉頭「官方時間」都要三個半鐘喎，佢竟然話，你哋full gear都行到夜山，我都得！你哋咁多行李都撐到，我一個細背包冇問題喎！仲鼓勵我哋：就到終點喇！
由於喺Lago Grey個位太大風，匆匆告別又唔記得同佢影相，直至離開前，喺碼頭等船又撞返佢，遠遠大叫：Hey! Hong Kong couples!
我打算臨走點都要搵佢影相，冇諗過佢落船拉埋一大班人搵我哋影。佢唔知係咪將我哋故事誇張幾倍，還是見人就講，竟然個個都知有對Hong Kong couples行咗22個鐘、堅持撐落去仲真係成功。佢個妹話，我哋成為咗佢榜樣，我哋經歷鼓舞佢，點都要捱落去、一定要完成路程，唔係聽到我哋故事，中途都會放棄。
最估唔到係，智利仔搵嘅一班人都紛紛話喺某某地方見過我哋、我有問過佢路，又喺回頭時鼓勵過某某就到，其實我已經唔記得咗，但個個話聽我哋連攻兩次百內塔，本身都覺得體力冇可能支撐到，點知呢兩條友又真係夠Insanely make it。突然間，我哋呢五日四夜同一路線嘅人，全部知道我哋故事，智利仔仲話，you guys become Patagonia legend!
搭巴士返返市中心後，落車仲不斷有人拍膊頭話nice to meet you, thanks for your story, it really motivates me. 好多我都唔記得佢乜水，但我又明白，易地而處一句鼓勵、萍水相逢一句you can make it，係會記在心中。我哋係開山後第一對亞洲人入嚟，個樣已經易認，仲要做埋咁癡線事。
如是者，無啦啦，我哋就成為咗呢班人入面嘅傳奇。你覺得佢哋行得好快、佢哋都佩服你冇放棄嘅堅持。
今個行程遇到好多好人，深明去旅行防人之心不可無，但唔好覺得個個係衰人，智利仔嘅好同對你嘅關心，已經超越咗「好」嘅地步。喺度，我都好希望佢咁阿Q精神會成真：做好事，有朝一日定會有好報。
我唔敢想像，果晚遇唔到佢，唔好話訓覺，我黑媽媽連邊度有得攞水都唔知。
圖中最右果位就係佢，我最終都同佢擁抱，講句：Nice to meet you. Muchas gracias!
除咗智利仔，呢幾日都仲遇到更多好人好事。
Part 3：我們遇上更多好人好事：20號風球風速被困廁所？
除咗智利仔，呢五日四夜都遇上好多好人，每每喺重要關頭有救到你一命嘅好人。正因為Torres del Paine嘅Park ranger同山屋職員係以hea為服務宗旨、以玩死遊客為己任，幾乎每個遇到嘅人都頂班仆街唔順，大家圍爐係咁鬧都成為開場白，而大家都深知要靠自己，彼此互動同鼓勵，至為重要。喺度都想記低更多交雜過、深刻嘅好人，就要由出發前講起。
1. 絕境送暖廣州人
首先，自己作為黑到盡處嘅人，去個標榜全年360日天晴嘅地方，可以落足五日雨。一到智利驚見變咗死城，先知原來撞正國慶，所有嘢都唔開，包括超市同大部份商店，仲要係連續兩日都唔開，對於出發前要買物資嘅我哋嚟講堅頭痕。如是者，我哋要搵齊五日糧食，花咗極多功夫，一間買菜、一間買罐頭、一間買火腿等等，點知咁辛苦搜集到嘅物資，出發前竟然漏咗火腿同腸仔喺Hostel！
心知要五日極消耗體力，竟然冇肉食，都嚇咗一驚——除非你係富豪，唔係應該唔會天價俾幾舊水喺山屋食垃圾食物。正當我哋慳住糧，Lunch只食香蕉夾包，就遇到對已移民智利嘅廣州人（所以technically我哋都係開山第一對登記嚟嘅亞洲人），佢哋好驚訝竟然遇到有人講廣東話，完全係他鄉遇故知，而果時我哋嚟咗兩個月一次香港人都冇見過。見我哋食得咁騎呢，竟然俾袋蛋糕我哋，係一袋唔係一個：食啦，行得咁辛苦要有糖份、夠能量先得架！喺你擔心唔夠嘢食時，一袋蛋糕補充到嘅力量，難以形容，而果刻仲要係兩個月冇遇過講廣東話嘅人，超興奮！
2. 圍爐互勉澳洲姊妹
之後，我哋喺「他媽的兩點收trail」百內塔，遇到一對澳洲姊妹，同樣行咗四個鐘被拒上山——後尾先知道，行得去嘅十個有八個都上唔到；第二日後，目測一日成功上到百內塔唔會多過20人。雖然同澳洲姊妹都好嬲好氣餒，但係組織返成件事、估吓沿途遇到邊個人上唔到去，傾下計火氣都大降，亦有種「you are not alone」圍爐感。喺雪地行到筋疲力盡時，佢哋請包M&M都好power up！
大家都係上唔到山受害者——途中有個大媽上唔到直頭喊曬崩潰咗，因為佢冇機會再返上嚟一次，我哋都討論點算好。澳洲姊妹住喺山腰Chileno，可以較近咁上都卻步，心知that’s gonna be a long day，而我哋住到Central，要再次行多一座山先到，即係double路程。佢哋聽到都笑言，we won’t blame if you guys cannot make it.
我哋第二朝癲到三點起身，沿途都冇遇到個前一日被拒上山嘅人，心諗會唔會見到佢哋。估唔到，喺我哋就到百內塔，竟然遠處見到澳洲姊妹落嚟；大家沿途都見唔到人，興奮到遠處就互相尖叫！佢哋大叫：OH MY GOD! YOU GUYS REALLY MAKE IT!! 見到同路人成功都超開心，係興奮到大家都眼濕濕果隻！百內塔果段結冰路有幾難行，行過你就明，仲要我哋係雪路，800米但好似8公里咁，澳洲姊妹鼓勵就更激動：You are almost there! 15 more minutes! Just 15 more minutes! It is so beautiful that you won’t regret it, I am sure! 有佢哋呢番話，完全令我可以一鼓作氣咁衝上頂！
3. 熱心打燈引路無名氏
好人都唔止係見到面嘅人，亦包括無名嘅人。話說我哋去Grande山屋，已經一片漆黑——當然行過去Frances campsite段路，Grande摸黑都超易行，但前一日已經冇曬力，又訓唔好，幾好行都會洩氣。Grande山屋好就好在夠大，遠處都見到有光，向住佢行一定冇死。當我近乎跑嘅速度衝去（我點知你班仆街會唔會收工就鎖門），突然見到有光係咁閃，我相信係遠處見到我嘅燈啦，我幾肯定係同我打signal，又閃幾下回應佢，然後佢覆完我，直頭喺度搖，為我引路。經過前一晚Frances campsite你死你事式管理，我都好驚Grande俾你去到，會唔會又冇人喺度，如是者，見到有人氣嘅光，真真正正係希望之光。我不斷同佢打燈回應，佢一路回應我，直至我差唔多到先停止。佢真正搖咗近大半個鐘先停，我到最後都唔知佢係乜水，冇機會多謝。
4. 一齊撐到終點法國妹
最後，仲有幾個交雜最多嘅法國妹。第一日出發時，喺架巴士度已幫過佢哋四個影相，大家住嘅地方、路線都一樣，第一日仲一齊行錯路，但佢哋行（跑）得好快，就冇再一齊行。回程途中，女朋友個冰爪唔知幾時跌咗，相信喺山頭好難搵得返。正當我哋唔知點好又遇到法國妹，佢哋竟然中途執咗，就咁徒手拎住，一路唱住歌一路問係咪我哋，因為知道總會有人回頭執，不如拎住先啦。
後尾，我哋又喺Grande山屋撞返佢哋，大家仲要同房。佢哋以為六人房自己霸曬，放到成房嘢，見到我哋入去，刻意執返張上下格床俾我哋，都冇好霸道咁用曬插蘇，讓返個俾我哋。前一日見唔到我哋去Frances campsite，竟然有擔心我哋咩事——再次要講，三唔識七路人都好過campsite負責人，後尾聽到智利仔講我哋故事，先放心我哋冇事。
最後一日，我哋由Grey出返去Central，因為女朋友已行到有腳傷驚行唔到，就預多時間，凌晨四點半出發。行（跑）山速度極快嘅法國妹，六點半先出發（連佢哋都唔相信行山地圖「官方時間」三個半鐘可以到），行咗三份二就追上我哋，繼續保持佢哋Hyper精神，突然喺20號風球風速下，玩人浪鼓勵我哋行落去。當去到終點，佢哋遠遠見到我哋，即刻衝出嚟歡呼，一路唱歌、一路再次玩人浪恭喜我哋完成，果一刻既激動又感動。
你知道，有一班人係同你同生共死、經歷盡一樣嘅挑戰同意外，成功果一刻，互相鼓勵種感動都好溫暖。
成功離開公園，去到巴士站竟然要要等兩個鐘先有車——呢個公園交通都係「不完美地」接駁時間。果時碼頭吹緊20號風球風速，大家行都行唔到，幾乎係吹到貼住碼頭邊撐住行。呢個時候，以玩死遊客成己任嘅Park ranger，都繼承佢嘅style，我哋問佢巴士站喺邊、佢極冇禮貌指一指出面就關門，當然，你都唔好期望佢會俾個位你遮風，橫風橫雨，你就喺個middle of nowhere硬食風。
文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過以下QR Code課金以作支持：
同時，你也可透過Payme link：https://payme.hsbc/jackyhei
或Paypal捐款：paypal.me/jackyhei
巴士站附近唯一一間餐廳都收埋，狂風暴雨之下成個湖邊超食風——你想像一下10號風球double企喺杏花邨海邊兩個鐘會點。冇人會理你哋死活，Park ranger應該都關門訓緊覺，大家都好無奈。法國妹突然忽發其想，你不仁我不義，唔俾我遮風，就爆個廁所用！
佢哋繼續自己好chill style，唱住歌咁搬曬啲枱去門口擋風同放行李，大家就匿入廁所做避難所，我哋連同另一對瑞士情侶，成班人就咁喺入面傾下計、食下嘢，仲開爐打邊爐，聽住出面吹到啲石都碌嚟碌去、不斷有唔同程度山泥傾瀉，好慶幸有呢個位。真心我冇諗過可以咁爆個廁所做避難，多得佢哋，成功撐過兩個鐘。
當然，仲有好多反方向嘅人，雖然冇乜深入交雜，但喺大家都俾Park ranger玩過、對佢哋同行山地圖極不信任下，彼此講前面有咩危險、真實時間同距離幾多都好鼓舞。好多段路冇任何指示，就算有指示都全部係錯，好多謝前人會用石頭砌或mark個啱嘅方向、喺雪路劃個箭嘴或交叉，開始自覺信其他人好過信公園指示，而每個人嘅鞋印同行山杖痕跡，都係好好嘅引路路標。
呢幾日嘅經歷，風景當然係好靚，亦如我所講係人生見過top 3，最深刻係呢度嘅人同事，絕境當前，大家同路人感同身受，係更難忘嘅回憶。呢班人大家路線都相若，其後喺Calafate、Chalten都不斷再次遇返，就喺街頭都好似老朋友咁傾好耐，共同感覺、甚至對往後旅程同人生價值觀係：We’ve survived in Torres del Paine, everything should be fine! 「晞。觀影記事」16週年聚會與旅遊分享會即將舉行，期待各位參與！請立即按此報名！
【延伸閱讀】行Tierra del Paine National Park要準備啲乜？行程預備貼士
【延伸閱讀】【阿根廷旅遊】此生看過最震撼瀑布：伊瓜蘇瀑布（附交通及路線教學介紹）
✨電影網店現已開幕，多款電影海報、電影精品低至$5起，立即按此搶購！✨
「晞。觀影記事」Patreon加強版已經開幕，精選深度獨家電影文章，請即按此訂閱！
更多資訊及文章，請Like Fb Page：
【有故事的旅人】
【晞。觀影記事】
MeWe: travelerwithmovie
