American Horror Story 美國恐怖故事 (Season 1)

推薦得多戲俾大家睇,好多時都有讀者推薦我睇某某戲,我有機會都會睇返,但呢套《American Horror Story 美國恐怖故事》有超過十個讀者都同我講,鐘意恐怖片一定要睇呢套劇!老老實實,人老咗都冇年輕時咁有毅力坐定定追劇,一來見咁多人力推,二來之前去Universal Studios玩佢個主題鬼屋,排咗140分鐘玩完都唔覺後悔(我真係俾Rubberman嚇到彈起),我忍唔住睇喇,果然有料到!

恐唔恐怖見仁見智,但我好鐘意個故事不斷扭來扭去,睇到最後兩集仲有新人物新謎團,而你知一個season就會完時,真係睇到好緊張。成套戲簡直將一切最陰暗人性面貫注,偷食吸毒亂交等等情節正常不過,點知強姦、肢解、食人、校園槍擊、亂倫、同性戀、戀母情意結、「母子戀」(「婆孫戀」?)等等我想像唔到電視劇可以出現嘅情節(兼畫面)都有齊,同時亦都建立到一個世界觀,未睇到最後都唔知邊個係人邊個係鬼(唔係講緊溏心風暴果隻鬼,係真係死咗果種鬼),甚至唔知肚入面果個到底係乜嚟,而成班鬼自身又有大量恩怨情仇,仲可以玩埋「人鬼交」,搞嚟搞去好似睇到好亂,但自己又可以自圓其說。最後一集嚟個靚兜,大玩感人牌,呼應返咁多集劇情同角色。善有善報惡有惡報,有惡鬼時都有一班好鬼,嘩,變咗東方因果報應?痴線架,咁都俾你諗到!

我最欣賞成套劇刻意將好多人物拆散嚟講,唔同視點又有唔同故事,好似好散但其實都講緊同一件事,最後慢慢砌成一條timeline,再借埋真實案件、都市傳說、靈異邏輯共冶一爐(我睇完先知萬聖節「功用」同盂蘭節相近),差在未去到《見鬼》咁玩埋投胎輪迴。唔止個故事夠緊湊好玩,最引人入勝或者係個講故事手法,原來恐怖題材可以咁樣玩!

 

文字工作者也得要吃飯,你的支持是我寫下去的原動力。請給點心意,給小弟走更遠的路,寫更多好文章,歡迎透過payme以下連結或QR Code課金以作支持:https://payme.hsbc/jackyhei
75486099_723429001505181_3402665167123644416_n
同時,你也可透過Paypal捐款:paypal.me/jackyhei

 

感謝各位支持,小弟執筆之原創小說,私人貨存已全部售罄,有意者繼續可到此文章內的連結購買!

 

更多資訊及文章,請Like Fb Page:
【有故事的旅人】
【晞。觀影記事】

IG請Follow:
#travelerwithmovie

發表迴響