實在太多讀者同我熱推呢套劇，咁我成日「昆」大家睇咁多戲，大家咁樣推薦，我冇理由唔俾反應架？所以，幾忙都好，我最後都用咗接近一個月時間睇完呢套嘢，但最後果幾集幾乎係一日內chur完，爽嘅。
講真，第一集意念係爆嘅，但之後中間果幾集就硬係差啲去唔到個高潮位咁，係有少少悶。而且，呢類「人工智能覺醒」、「機械人叛變」、「反思真我假我」嘅故事拍過好多，初頭睇都唔覺得有咩新意，當中人工智能反思世界真偽嘅情節，我覺得反而比唔上其中一套我嘅All-time favourite《真人Show》，講一個「演員」唔知自己係「演員」，最後決定突破攝影棚去睇吓外面世界，算係Jim Carrey較有發揮嘅一套戲。
曾經覺得自己好黑仔，的確我都有反思過呢個問題，到底我嘅人生係咪假嘅？係咪背後有個「造物主」控制緊自己有個咁嘅爛劇本？冇可能人生每一樣嘢都咁戲劇性喎！你可能覺得我癡癡地線，但當一個人黑到極點、幾乎超越咗常理可以接受時，你都會質疑自己呢段「戲劇人生」係咪真，所以睇《真人Show》時我係極鍾意嘅。
文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過payme以下連結或QR Code課金以作支持：payme.hsbc/jackyhei
同時，你也可透過Paypal捐款：paypal.me/jackyhei
拉得遠咗返返嚟，開頭悶悶哋，但係「老蘭」家族點會俾段咁普通嘅故事你？由第七集結局開始，幾乎集集扭、集集有爆點，完全係一個「Mind-fuck」嘅故事，睇到我金睛火眼嘆為觀止，去到最後一集以電影片長兼氣度去解釋一個極級悲劇故事，不斷扭上扭上扭上扭上扭，扭到最後一分鐘都要再扭，仲要加多個彩蛋話你知仲有得再扭，扭到有一刻以為我睇完會有人走入嚟話自己原來都係接待員Holy Shit。
睇到最尾，原來成個故事唔單止講叛變、講覺醒咁簡單，仲牽涉好多更深層次嘅問題，覺醒之餘都不忙親情、覺醒之餘都不忘奉行造物主嘅使命，人之所以為人，係因為我哋有獨立意識，但有獨立意識又係咪代表自己係自由？結局一班角色幾乎冇邊個有好下場，就算明顯「下集再戰」，呢刻個個都係悲劇收場，人又好接待員又好，自以為自己自由，但其實都係困喺一個囚牢入面永不翻身，呢個意念係極正嘅。
係，初頭的確係好悶，但我鍾意成個故事架構會慢慢鋪個世界觀出嚟，初頭同你講玩法係冗長咗少少，尤其頭兩集將同一件事係咁loop係有少少重覆，諗返呢一堆嘢又真係需要，當佢搞到你loop到開始唔知去緊咩故事線、咩時空時，就係最神奇妙算嘅一刻，成個世界觀就此建立出嚟，都有少少俾觀眾代入咗接待員身份：你睇緊嘅嘢唔係你所想嘅嘢、你自以為係真嘅嘢都係假嘅，最終「造物主」都係「老蘭細佬」。大結局扭橋扭到目瞪口呆，但最扭最震撼果個絕對係「黑衣人真正身份」，成功俾你fake足九集半，但諗返又完全言之成理，甚至令你想重新睇一次。
到最後，人之所以為人，人有意識去做自己所想嘅事，都係因為我哋曾有悲劇在身、對自身有所不足，而試圖要去突破、要去挑戰呢一堆困難，先令你有一個活下去嘅目標，都係俾呢班接待員活下去嘅真意。諗返以前覺得自己人生實在太黑仔太戲劇性，可能呢個都係我活下去嘅真意？（笑）
真心，單係最後一集嘅調度，我覺得「老蘭細佬」可以試吓出嚟拍套真真正正長片，應該不比阿哥專美。
‼最後機會‼
小弟執筆之原創小說已賣剩最後一批，售完即止，請即訂購：http://bit.ly/2PKXYFA
台灣書局兼網上平台亦已上架，可去文中連結購買：goo.gl/xzCymP
更多資訊及文章，請Like Fb Page：
【有故事的旅人】
【晞。觀影記事】
IG請Follow：
#travelerwithmovie
