事隔一年，又嚟喇！

十週年仲未諗到搞咩好，咁啱有機構搵我合作搞場分享會，不如就將呢個Topic翻生做頭炮啦！

作為一個睇得荷里活電影多嘅影迷，深知無限Reboot係王道，但今次小弟叫做「2.5」，正正唔想就咁Reboot，都想喺舊年嘅內容有所延伸。

雖然第二場比第一場喺時間控制上好多，事後諗返都係太貪心講得太多地方，短短兩個鐘講盡全世界咁，不如今次就揀兩個最深刻嘅電影場地勝景遊－－北美同冰島，再將內容深化；亦因為有唔少讀者對冰島好有興趣，所以今次除咗場景分享，都會再深入講吓北美同冰島旅遊有啲咩要注意、有咩趣事發生。

除咗電影場景分享，都會加入一個我從來冇分享過嘅要點：到底點樣搵呢堆場景出嚟，你點知啲場景喺邊度？

北美部份我會更深入去分享果邊睇戲嘅經驗，就例如我成日都話香港睇笑片好似「死屍場」咁，喺美國睇過最好氣氛嘅戲係可以有幾癲？當我睇完Laser IMAX已經返唔到轉頭時，美國對比亞洲嘅Laser IMAX又係咪真係正啲？

所以，今次有部份內容同舊年嘅的確係一樣，但如果舊年內容係「精華遊」，今次就算係「深度遊」喇。

最後，我知你要買都買咗，唔買拎支搶指住你個頭都唔會買，但以防仲有漏網之魚想買仲未買，小弟本新書喺會場都有發售，再次以優惠價$100出售，只限現場參加者。我本書係乜可以睇呢度：goo.gl/J9QdBR

日期 | 30/3/2018
時間 | 15:00 – 17:00
地點 | 觀塘鴻圖道59號鵬光大廈4D
費用 | $60
表格 | goo.gl/pAkgj1
*參加者需填寫Google Form並Inbox告知，入數後方為核實，為簡化現場收錢程序及點人數，請先行入數。今次場地面積有限，唔可以好似舊年咁無限加位，請盡量預先報名，希望到時見到你！