睇完《陰宅異事》雖然唔太鍾意個結局，依家仲要話真係完咗冇多個Season去解釋，咁就唔多掂，但就要一讚導演Mike Flanagan控制氣氛嘅功架，再三再讚第六集一鏡直落好神。如是者就搵返佢舊作嚟睇。
呢套《傑羅德遊戲》有幾個角色都係同《陰宅異事》一樣，睇返導演其他作品都好鍾意用呢個班底，包括吹到好神嘅《死亡占卜：邪門再開》。故事講老公同老婆玩性遊戲，點知扣完手扣老公Sort of「馬上風」，老婆喺張床度叫天不應叫地不聞，咁就一套戲。
初時睇以為係《鱷口逃生》、《活埋》、《冰峰36小時》果類「絕境求生片」，點知原來都係同《陰宅異事》一樣，用呢個框架去包裝另一樣嘢。實際係講老婆嘅過去、以前一啲秘密，都因為老婆就咁喺一張床上面，搞咗幾日除咗隻狗都冇太大危機，只係一場場「腦交戰」，睇落都有少少悶。
換個角度睇，因為作為「絕境求生片」一啲「絕境」都冇，就要靠過去陰影去撐足個半鐘，甚至有角色跳出四面牆同佢「腦交戰」，由過去不堪回首經歷，反而成為今日嘅救命關鍵，呢種設計都算有創意，而到最後「自救」方法都幾恐怖。因為平平淡淡咗個半鐘，估佢唔到最後竟然咁血腥，係寒咗一寒嘅，只係「真正嘅結局」有少少多餘，唔知原著係咪咁。
或者唔係《陰宅異事》，我諗我未必會有興趣睇呢套嘢。唔可以話唔好睇，只不過當驚慄片或恐怖片咁睇，如果冇《陰宅異事》「打底」，應該晨早熄咗機。
文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過payme以下連結或QR Code課金以作支持：payme.hsbc/jackyhei
同時，你也可透過Paypal捐款：paypal.me/jackyhei
感謝各位支持，小弟執筆之原創小說，私人貨存已全部售罄，有意者繼續可到此文章內的連結購買！
更多資訊及文章，請Like Fb Page：
【有故事的旅人】
【晞。觀影記事】
IG請Follow：
#travelerwithmovie
