《鬼影特攻：以暴制暴》（6 Underground）：任性的Michael Bay

Michael Bay出品，我諗睇得都知道係乜嚟，所以既然你開得嚟睇，一係為咗睇刺激動作、一係花生佢又搞邊科，小弟兩者都有，一開就大開眼界。

印象中，從來冇睇過套戲可以無止境咁樣飛車，你喺屋企睇可以mon住時間，開場完全唔知發生咩事情況下，Michael Bay夠膽死同你飛車飛足半個鐘，不問情由，毫無背景，仲要話俾人知，自己唔止可以獨創一套「Michael Bay style」，仲可以好任性咁樣玩到大一大。

慢鏡、低炒、分分鐘有廣告、無啦啦有索女阻住、放煙花式爆炸、架車凌空打720度翻斗，今次仲要再創一新招：平地炒車。你唔知咩事，總知架車無啦啦平地爆起，Boom! 畫面係靚，但我相信戲院睇應該會笑出聲。你話爛又唔係，講真真係緊張刺激，之但係佢做緊乜，你唔知道，純粹觀能刺激。

如是者，成套戲的確好似《變形金剛：終極戰士》，唔知佢做緊乜，由頭打到尾，唔駛有劇本、劇情唔駛有邏輯，甚至剪接極奇怪，總之就係一大堆動作場面炒埋一碟就得。不過，呢套好過《終極戰士》好多，因為動作場面有花過心思，都真係拍得緊張，尤其連場高空玩命係睇得緊張嘅，唔係睇住一堆爛鐵亂砌。

Michael Bay成日俾人話佢「環保重用」鏡頭，Sorry囉俾你識穿咗，咁「環保重用」idea都得掛？當年《變形金剛：殲滅世紀》玩磁力幾乎吸咗成個香港上天，今次唔止再創一個「不存在的香港」－－到底果度係新加坡定香港，又再玩一次「磁力動作」，which is not really that bad，過癮過《殲滅世紀》，又或者講，可能基於「現實」背景，睇果陣係幾爽。

文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過payme以下連結或QR Code課金以作支持：payme.hsbc/jackyhei

同時，你也可透過Paypal捐款：paypal.me/jackyhei