睇完Disney+一堆National Geographic紀錄片，Netflix呢套新紀錄片都好好睇。美國劣評如潮睇落評語都係因為奧巴馬做主持，但你又無可否認佢旁白把聲做得幾好，不比另一位老是常出現黑人紀錄片旁白專員Morgan Freeman失禮。
撇除奧巴馬呢個人你鍾唔鍾意佢都好，套紀錄片遊走世界各地唔同國家公園，第一集介紹一堆、之後幾集就逐個公園主題重點咁講。不過，呢個唔係旅遊節目，都唔係講國家公園有咩好玩好行，而係講生態。喺今時今日嘅超高清畫質下，《國家公園巡禮》幕幕超高清畫面係睇到你眼前一亮，更神係拍到好多唔同珍貴動物嘅鏡頭。雖然，捕捉動物最細微一面，係呢類紀錄片最基本功力，但呢套完全緊扣到當時主題，間中配埋緊湊嘅音樂，有幾場睇睇吓竟覺得幾緊張，甚至會令你覺得班攝製隊，點解可以好似「偽紀錄片」攝影師咁，永遠立場咁中立唔出手拯救
《國家公園巡禮》用上咗好多高科技鏡頭，但都好難想像點解佢可以捕捉到呢啲畫面，完全追蹤住隻動物唔同位置點出沒，當中如美國蒙特婁海邊果一連串鏡頭，跟住隻小海獅去到最偏僻位置，好難想像咁刁鑽畫面，攝製隊要捕咗幾耐、跟咗幾耐先至拍到，而出嚟嘅效果係好睇嘅。
睇呢類紀錄片如果唔係去到有犯罪或者獵奇嘅層面，冇興趣嘅議題好易會拍到訓著，呢套每隻動物、每個習性唔會講太耐，又或者搞到好學術性，剛剛好俾你有大開眼界感覺；唔駛好有追劇壓力，食飯果陣睇一集半集，畫面都好治癒。當然，如果你鍾意大自然，甚至去過佢講嘅國家公園，一定會更投入，重點當然你唔會反感奧巴馬做旁白。
