有故事的旅人 X 晞。觀影記事 讀者聚會詳情

gathering

講咗幾年終於成事,老實講,見大家一直問咗我咁多次,而做咗幾次「意見調查」,大家真係有興趣搞我先至照搞咋,唔好搞完出嚟又得小貓三四隻,場面會好樣衰。個場都幾大吓,可以容納近一百人,不過有三四十人我已經滿足架喇。

其實,呢個題目我一直都好想講好耐,平時文字寫出嚟未必多人睇,但希望我口講加埋有相,同埋自己親身故事,大家會有興趣?

自己鐘意旅行亦鐘意睇戲,喺外國睇戲、搵電影場景、去電影主題樂園,都係每次旅行其中一部份,好多時,都因為電影帶我認識世界。好似之前去美國、去冰島,好大原因真係一場「電影朝聖」嚟,一邊旅行、一邊置身電影場景,其實絕無違和感。講真,假如一個地方唔係靚,又點會有電影公司去取景?

如果唔係《丹麥女孩》,我唔會去咗哥本哈根一條勁靚但Out-of-track嘅街;如果唔係《星際啟示錄》,我唔會睇到冰島咁靚冰川,都唔會喺附近睇到北極光;如果唔係無數套戲「滅城之戰」取景地,我唔會去芝加哥睇個靚到喊夜景;如果唔係鐘意恐怖片,我唔會迷上咗Universal Studios Halloween;如果唔係鐘意睇戲,我唔會見識到真正IMAX係有幾震撼。

內容或者有小部份可能有分享過,但都有啲未講過嘅,例如:
。唔同地方睇戲,觀眾反應同文化有咩唔同?
。有咩景點係去完似曾相識,先知道係電影場景?
。美國眾多電影取景地,係咪真係電影世界咁美好浪漫?
。電影主題Themepark都有好多種,邊啲係伏、邊啲真係將場景神還原?
。好多戲都聲稱喺歐洲取景,實地去到靚就係靚,但真係有拍過?
。已經消失、全球最大嘅Sydney Darling Harbour IMAX可以有幾大?
。已經消失、全球最古老放映菲林嘅露天戲院係點?
。已經消失、變成全球面積最大IMAX嘅Mann’s Theatre睇戲有咩感覺?
。巴爾幹半島睇戲可以有幾平?
。大陸睇戲真係咁地獄?
。印度睇戲係咩玩法?
。Universal Studios到底有乜咁好玩令我年年都去?
。除咗紐約、芝加哥、洛杉磯等大城市,美國仲有乜正嘅電影場景?
。喺外國睇人生最癲嘅一場戲係點?
。喺美國首日睇大片氣氛可以有幾好?
。好多朋友都問,到底係點搵呢堆電影場景出嚟?
。有邊幾套戲令我決心要去某某地方?
。最鐘意嘅電影場景係邊幾個?
。。。諸如此類。

其實,重點都係,好多讀者傾咗好耐、講咗咁多年,都想同大家聚一聚、傾吓計嘅。睇吓最終有幾多人會到,我會再就一就個內容,如果到時真係得小貓三四隻,淨係想傾計唔聽我吹水嘅都得,不過錢都係要照俾嘅XD

如果大家有興趣參加,麻煩Inbox小弟,用「有故事的旅人」或「晞。觀影記事」Facebook Page都冇問題,告知全名、電話同人數,之後會再俾埋入數方法大家,一經入數確認後,恕不退款。

希望多多捧場啦,呢件事構思咗好耐(冇三年都有兩年),兼搵場地都搵得好辛苦架。呢個Post可能未必好多人睇到,不過我會狂谷架喇。如果有電影公司朋友,或者傳媒朋友有興趣,都歡迎參加!

更多資訊及文章,請Like Fb Page:
【有故事的旅人】
【晞。觀影記事】

IG請Follow:
#travelerwithmovie

廣告

1 則留言 追加

  1. 有故事的旅人 x 晞。觀影記事 說道:

    Please inbox your name and how many person in Facebook page

    按讚數

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s