嘉年華員工奇遇記(Part 1):最憎聽到嘅說話

【睇文前留意喇】
嚟緊2月26號有首次讀者聚會,等緊你嚟參加!
詳情請睇:goo.gl/lHXAeO,希望到時見到你 🙂

%e6%9c%aa%e5%91%bd%e5%90%8d

一直好想講呢期喺嘉年華入面嘅奇遇。兩年前,我返過嘉年華,寫咗篇文講入面嘅事,估唔到篇文紅咗,當時我仲返緊工,搞到俾人起底搵我係邊個,所以廢事煩,都係等完咗先至發文啦。

再返原因都有幾個,一來因為自己真係好無聊,二來做「廢青」都要等錢洗,三來我又有少少想延續Working Holiday嘅感覺。始終兩年前返過,可以帶到歡樂俾人,係一件好開心嘅事;同時又見盡香港人嘅人性百態(醜態),為咗一隻公仔可以幾樣衰,今年有時間嚕,咪再去體驗吓囉。兩年後再返,感覺又有少少唔同,因為始終有過一定工作經驗,都唔再係十八廿二,俾一班細過你嘅人做你super,又會有人大你點點點就冇工返、點點點又唔駛旨意再返之類。你自會覺得,原來自己已經過咗一個返「炒散」嘅年紀,老老實實呀,幾廿歲人我真係為錢,就唔會返你果五十蚊啦,純粹都係體驗吓個氣氛姐。

曾經做過幾年服務業,香港人嘅百態都見得多,但近年已經離開呢一行,最近都返呢個嘉年華。兩年前、兩年後,大家嘅醜態都冇變到,感受最深係依家啲細路仔粗口之流利,簡直驚為天人,我唔止聽到一個幾歲嘅細路粗口橫飛,對住阿媽講「屌你老母」,拍檔聽到大笑:「乜依家細路咁重口味,細細個就想屌阿婆?」呢啲奇人奇事另文會再分享,但第一樣想分享,正係一堆令人極反感嘅說話,我諗,套用返服務業,都好啱用。

請記住,顧客唔係至上,唔該尊重其他人。

。「喂!!!」「唔該!!!」「我等咗好耐喇!!!」「有心唔做我生意呀!!!」
其實我唔知香港人係咪真係忙到咁。我哋成班忙到踢曬腳,已經唔得閒控制你哋排隊,唔該你哋就自律少少,等多幾分鐘唔駛死。成日話大陸人唔識排隊,你哋爭先恐後為咗早果幾分鐘玩先,根本冇分別。我諗你哋都見到,成個檔入面得四個人,波就可能得廿個,你哋同時四十人圍住我哋,你仲「唔該」啲乜?我唔你老_咩?你仲嫌咩慢?喂喂喂,你喂乜春?

。「吓乜唔係XXX就有獎咩?你老點我呀?」
「XXX」指嘅係遊戲規則。大家收你錢或sell game前都會好簡單講玩法,我唔敢講個個同事都跟足做,有時忙起上嚟都真係講唔切,但我哋遊戲規則大大隻字寫住。你可能要將全部樽打離開先有獎、你可能要拋中一定數量目標先有獎、你可能要套中某個顏色嘅杯先有獎。自己為咗玩嘢興奮到唔聽人講嘢,講真,返咗咁多日工,邊個有聽我講嘢邊個冇聽我講嘢,我一眼就睇得出,如果講完你唔聽、寫完你唔睇,係你自己問題,唔好聲大夾惡。老老實實,如果咁易中,洗鬼你玩?

。「車!呃人嘅!喂唔好玩呀,呢度呃人架!」
你幫我趕客,某程度上我好多謝你,我可以做少幾個客,但唔該唔好呃呃聲。你自己技術有問題,又或者你唔聽清楚就走去玩,唔好話人呃你。撫心自問,兩年嚟我做過好多個位,邊個係呃我當然知道,但呃還呃唔關我事,我係負責HOST檔嘢,個遊戲唔係我設計,唔該唔好鬧我。

。「你可唔可以幫我推冧個XXX?」
「XXX」係指個物件。我明白有時係講笑,唔忙時我都會同你搞GAG吹兩句水,但好多人係當真!真係以為我會幫佢出術!然後佢哋就不斷嘈,話規距係死嘅人就係生嘅,諸如此類,你班友冇病呀?問埋好多呢類膠問題,真係好把火,忙得滯唔串你,串你又嬲嬲豬。

。「唔該可唔可以要紅色,丫黃色,丫綠色,丫藍色,丫都係要返紅色」
我頂你個肺呀?遇到呢啲情況,我會詐聽唔到,一係就咁掉隻嘢俾你就算。細個我都玩過嘉年華,我明白辛辛苦苦掟到隻嘢,梗係想要隻自己鐘意嘅,但唔該你哋揀清楚先出聲,我幫你換一次冇問題,你拿住四隻嘢揀五分鐘都未揀完,其實我哋真係好忙,唔得閒同你慢慢磨。

。「(同細路講)唏,唔駛理哥哥,照點點點」
做呢份工我見識最多係,乜嘢叫做「冇家教」。除咗前文提及細路粗口橫飛外,最憎就係家長「為老不尊」,教細路點樣出術,仲要喺我面前講,當我係聾嘅。見到細路仔玩,我諗大部份同事都唔會執得太嚴,過少少紅線就算、甩手俾多個波你又點話,但呢班「大人」自以為是教壞班細路去破壞人哋規距,仲覺得自己好醒時,咁你唔駛理哥哥,哥哥都可以你中獎唔俾你。

。「吓咩呀?我聽唔明喎,姐係點呀,你講多次啦。吓,你講完我都係唔明囉,姐係點姐」
唔好同我扮傻仔,你真係聽唔明定玩嘢,我睇得出。對付呢種人,呢個時候用上一招就可以收佢皮。廣東話聽唔明,我即刻轉用普通話答你,自會即刻嬲嬲豬。

。「隔籬檔都可以點點點喎」
全場同事都係同一個training,唔該唔好用呢隻心理戰嚟拋我哋。講咗冇就冇,我哋已經好忙好唔得閒,你呢啲不設實際幻想麻煩你哋自己ff就好,咪當我哋傻嘅。如果隔籬檔可以點點點,咁你去返隔籬檔。

。「我排隊先架喎!」「我一直玩緊架喎!」「咁依家點先!」
都係果句,我哋好忙,你哋唔該自己拆掂佢,一係等一等,你喺我面前做show咁嘈,我都係唔會理你。

。「你執完未姐?我掟中你係咪有大獎呀?」
你試吓丫。

。發爛炸
好多時,都會有客問我,有乜橋妙。其實十之八九遊戲都係冇任何技術可言,純粹靠運,我自己就覺得,最好嘅「橋妙」係,你玩咗三次都唔中,就唔該「止蝕離場」,同賭局一樣。幾乎90%嘅人玩三次都唔中,就覺得自己之後會中,結果玩咗十次都係唔中,然後就發老脾。我企喺度食花生,都知道你一定唔會中,因為你已經蝕咗道氣。最後,將個波一嘢掟落我或同事度、踢BOOTH、鬧其他客、扯啲公仔。你知唔知咁樣做我哋可以報警。唔該,控制一下自己情緒。

我知好多香港人都真係好忙好大壓力,但你想發洩時,都唔該唔好將自己嘅快樂建築喺人哋痛苦身上,仲要係用呢種模式去建立。有時,唔係自己俾咗錢就大曬、講一句「逗得份糧就預咗」,我哋係唔包俾你拎波當活箭靶發洩。

呢堆說話聽到當然好嬲,但遇上奇人奇事嘅,又會覺得好好笑,見盡香港光陸怪離乜人都有,下文再講。

【延伸閱讀】Speed Dating奇遇記

【延伸閱讀】在香港Working Holiday系列

【延伸閱讀】繼續在香港Working Holiday系列

更多資訊及文章,請Like Fb Page:
【有故事的旅人】

【晞。觀影記事】

IG請Follow:
#travelerwithmovie

廣告

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s