晞。觀影記事開幕九週年的難忘時刻

【九週年的難忘時刻之(一)】

19145773_787239684779455_39227647806242691_n

好快就係「晞。觀影記事」講咗廢話九週年嘅日子,「晞。觀影記事」全體員工上上下下為呢個日子諗咗好耐,諗過好多方法想答謝大家,但除咗再搞聚會同埋送嘢外,大家R爆頭都諗唔到可以有咩做。就算送嘢,除咗送戲飛又送唔起啲咩。其實呢,大家有諗過不如食住個勢送「海乜戀」單位一個,但由於「晞。觀影記事」全體員工都冇乜錢,與其吸引一班「抽飛黨」亂入,不如倒數一下我哋全體呢九年嚟覺得好難忘嘅事。

做咗九年喇,點解要講呢番廢話,都想再一次喺呢度重申:「晞。觀影記事」並無「全體員工」,只有小弟一人廢話連篇。請唔好再多謝「全體員工」,小弟聽完會有少少黯然。

當然,要由最初講起啦。之前都分享過,自己好多年前已經有寫電影文章,只不過身邊冇乜朋友鐘意睇戲,與其獨樂樂不如眾樂樂,開個Blog嚟玩吓。身邊一直有朋友同我講呢樣嘢,我諗咗一段時間都的唔起心肝去做,直至呢一刻。

依家睇返我唔覺得特別好睇,但當日睇完《鬥智21點》覺得成套戲超「神」,鍾意到不得了,不斷同身邊朋友推薦,結果當然冇人會信你,甚至聽都冇聽過,因為冇記錯當年淨係喺兩間AMC上映(包括已執嘅AMC又一城),所以決定喺當時好多人用嘅Sinablog寫文。
點知,篇文一出即刻俾Sina做咗推薦文章,即時充滿信心,一直係咁寫,結果一個月之後出現一套叫《蝙蝠俠:黑夜之神》嘅戲,文章高峰時期一日點擊接近一千,以當時開得一個月嘅小弟嚟講,係一個好大嘅鼓舞。後來即使去咗北京實習,個幾月後返返嚟重寫,又遇上一套叫《80分鐘死亡直播》嘅戲,點擊直線上升,為我打下一支強心針,決心盡量只要入戲院睇過嘅戲都會寫。呢九年嚟,除非完全唔明或者訓足超過半套戲,我都堅持會寫。第二次去實習果年或者超忙寫唔到,甚至去澳洲working holiday都套套寫,其他都冇乜甩過。唔知心水清嘅朋友,又記唔記得我講過邊幾套戲睇完係冇寫?

 

【九週年的難忘時刻之(二)】

19030345_787244554778968_2780335404661892006_n

上個Post嘅答案:睇完戲唔寫最經典例子,係第一集《星空奇遇記》,當年喺美國睇冇字幕完全唔知佢講乜,之後睇返字幕版先至驚為天人,甩完一篇就成個summer都冇寫,係唯一一段時間全部戲都冇寫。另一個經典例子,好可惜兩集《神探福爾摩斯》都冇寫,第一集一落機即刻睇,結果累到訓足全套戲,散咗場都唔知,至於第二集喺澳洲睇冇字幕,我都係完全唔明佢講乜而冇寫。

有睇開小弟Page嘅朋友都知道,周不時我講嘢好直,成日都俾人圍我,又話要起我底,又話要我收聲,甚至有人開過個假Page嚟搞我,其實咁多年嚟唔通仲未睇化咩?最原始俾人圍,圍得仲金過依家。

話說當睇戲時遇到一件港女嘈嘈閉,已經嬲到震,散場竟然有人搵佢影相,事後先知原來佢係當年歌唱比賽一個參加者,睇完戲純粹好嬲寫咗呢篇文,點知唔止俾人推上「無記」討論區,甚至推到上生果日報,結果當然有人撐有人圍,Fans VS Hater,由我個Blog鬧到去各大討論區。

我一向最憎「已讀不回」,所以,曾經我大部份留言都會覆,但經過呢件事之後,我學識咗一樣嘢,當罵戰一發不可收拾時,唔覆都係一個上策。好在當年Social media未算太盛行,唔係小弟應該晨早已俾人起咗底。不過,正所謂 #睇人仆街最開心,呢單嘢竟然令我點擊率急增,亦都由呢單嘢開始,多咗一批讀者,我都唔知多唔多謝佢好。

講起俾人圍,間唔中都俾人鬧我 #你條仆街一定收咗錢,其中一個原因就係優先場喇。我知道大陸,甚至台灣嘅優先場,可能真係會俾錢Blogger,但我對得住天地良心,咁多年嚟一個崩都冇收過。

喺度我好多謝咁多間電影公司、各位Freelance PR,咁多年嚟對小弟嘅支持,即使我成日「講真話」踩到你哋嘅戲一文不值,你哋都仲願意搵我去睇。咁講可能又俾你哋話我擦鞋,但喺度我都好想分享返當年第一次搵我睇優先場嘅故事,係邊套戲?下回分曉。

 

【九週年的難忘時刻之(三)】

19055564_788658751304215_9130512908705278039_o

尋日Part 2講完第一次俾人圍,好在冇引起罵戰,我知道自己寫呢個Post,俾人圍嘅機會係極高,但我都想襯呢個機會,多謝一直支持我嘅電影發行同戲院公關朋友們(或者叫Marketing啦,今時今日仲邊有分得咁清),仲有其他傳媒、記者朋友。

大學有做過電影學會,都識到有幾位電影公關朋友,但隨後落莊冇做,又或者佢哋唔做,我都冇乜藉口同機會去Contact佢哋。從來,我唔會去R飛,都係大家自己嚟搵我,第一次用自己名義有收到邀請嘅係《奇幻逆緣》,果一下,我真心感動咗,覺得自己做嘅嘢,係會有人賞識。果位公關朋友,我知道你仲有睇,你知道我講緊你的。

有咗一次自有第二次,繼而有唔同公司搵我,隨住網媒興起,可能大家都多咗搵Blogger寫文。算唔算係時勢造英雄?呢幾年嚟,入得呢個圈子,就知道有幾黑暗,可能有人要霸靚位、可能有人死都要打尖、可能有人冇收到邀請就講到自己好慘要生要死、可能有人鍾意死纏難纏俾人Blacklist都照纏、可能有人覺得我冇料到扮代表誓言要杯葛我,睇得多聽得多都得啖笑。

或者我唔夠資源做到好似後起嘅「友好專頁」有成支團隊,都冇錢落廣告谷到自己好多Like,我從唔會話自己係「影評人」,只不過係一個小小Blogger,分享自己嘅心得,鍾意會讚、唔鍾意一樣照插。你哋願意邀請我,我好榮幸;你哋唔邀請我,又或者我唔得閒睇,都會之後俾返錢入場,又或者好鍾意嘅,睇第二次又有乜所謂?鍾意電影,係唔會因為有「免費飛」先至入場。

由《奇幻逆緣》開始,我半隻腳踏入咗呢個圈子入面,衰啲講係互相利用,樂觀諗都因為你哋邀請,令我睇到好多根本冇諗過睇,而又好鍾意嘅戲。自此之後,每個星期總會有幾晚留去睇戲,無形中,成為咗我生活習慣。

因為咁,我識到一啲「友好專頁」嘅朋友,亦都同唔少公關或記者私底下做咗好朋友。好多人以為你睇得優先場,實係 #你條仆街一定收咗錢,有讚冇彈。其實,某幾位可以「講真話」嘅朋友,分分鐘散場後同你一齊插爆自己套戲有幾爛,都係一種樂趣嚟架。唔止電影,甚至生活上、工作上,某幾位朋友都幫咗我好多。有啲嘢,在心中,冇你哋支持鼓勵,冇今日嘅「晞。觀影記事」。

講起記者朋友,自己因為呢度都做過好幾次訪問,不過以前唔想出樣所以冇Po到出嚟,嚟緊講嘅呢一篇,都幾深刻的。

 

【九週年的難忘時刻之(四)】

19142929_787903801379710_2864260528805379013_o

由於試圖「起底」者眾,我都淆淆哋放自己相出嚟,所以當日訪問完都冇po到出嚟。

成日話「冇錢收」,但我開Blog呢九年嚟,又唔係樣樣嘢都要用錢去衡量嘅。我做過幾次電台、報紙、雜誌、網台嘅訪問、出到專欄,甚至曾經有學校Inbox我授權拎一篇文章做考試嘅「閱讀理解」。呢啲嘢,可能一個崩都冇,但果份成功感,係錢都俾唔到嘅。

最深印象係呢一次。呢位記者朋友做得最足資料搜集,做過咁多次訪問,呢次唔止傾得最開心,更加最受尊重,而傾咗大半個鐘,出嚟製成品可能真係得半版紙,但見到竟然同多位「猛人」一齊出現,都受寵若驚。

另一個原因係,可能呢張相我好鍾意。我冇chok架,大家知我從來都係sell廢青形象架啦,係選「全港十大廢青」我應該可以入到三強位置果隻,竟然有張咁嘅相?😂

「較受讀者歡迎」我唔敢亂認,之但係咁多年嚟,至今最「爆」嘅一篇文章係邊篇,你又估唔估到?老老實實,到今日我都唔明,點解果套戲篇文會點擊率高成咁,截至呢一刻,都仲上升緊的。

 

 

【九週年的難忘時刻之(五)】

19388621_790564194447004_5742435757334602258_o

尋日同大家講過自己最開心嘅一次訪問,寫咗咁多年,更加開心當然係大家有興趣睇我嘅文章,曾經俾一啲名人share過,例如當年九把刀share咗我篇《那些年》,點擊率接近一日過萬,但果篇再高都唔及呢一篇。

大家興睇色情喜劇,可能要數《肉蒲團之極樂寶鑑》或者《一路向西》,但當年兩集《金瓶梅》其實都唔錯,可能當時唔算好爆,而小弟又真係走去寫,結果呢一篇《金瓶梅II:愛的奴隸》至今仍然係我點擊率最高嘅文章,我到依家都仲等緊有冇下一篇可以破到佢。

寫咗九年,我自會知道最高點擊率嘅戲,一定永遠唔會係大片,可能偶有發生,但可能大家點都會睇,所以一到大片例如近期《盜墓迷城》《加勒比海盜:惡靈啟航》《狂野時速8》等,其實冇乜人篤,反而有話題性嘅戲就好多人點擊,例如年初嘅《天煞異降》《藥到命除》,當然唔少得一眾「咸片」如《濕濡的女人》《不是色情電影》等等。當然,多人睇又好、少人睇又好,咁多年嚟我都一樣照寫可也,成為咗一個習慣了。

九年嚟,我新舊blog已接近2,000篇文章,點擊人數已有400萬(目標今年突破500萬),如果以人頭嚟計,可以話超過一半香港人口都支持過小弟?XD

你又估吓,呢九年嚟最感動嘅第一個數字,係喺幾時發生?

 

【九週年的難忘時刻之(六)】

19264333_791127617723995_4338878591643194537_o

尋日同大家分享完開Blog以嚟最高點擊率嘅文章,講到最開心嘅一個數字,就係我嘅100萬,喺開Blog三年幾後,點擊人數終於突破咗100萬。五年幾前,講緊Social Media仲未係咁盛行,冇Facebook Page、冇IG(係,小弟有個IG:#travelerwithmovie,in case你仲係唔知的話),根本冇咩辦法去推Post,靠嘅就真係你哋,一班忠實嘅讀者,定期追看我個Blog嘅文章,我先至可以三年幾衝破100萬。

今日,Social Media太盛行,「入行門檻」變咗,玩嘅唔係你嘅熱誠同實力,鬥嘅係你有冇錢、識唔識製造話題。寫得幾好都冇用,因為冇人會睇字,識得拍片,最後將一條片剪到有咁簡單得咁簡單,咁你就多人睇。

成日好多讀者話,唔好唔開心啦,我有睇你喎,點會冇人睇呢?喺今時今日Facebook玩法下,的確我知道有班朋友係固定讀者,會不斷追看我嘅文章,但今時唔同往日,你唔Like你唔Click,Engagement同Reach會低到極限,你以為你篇篇文都有睇,其實已經miss咗好多而不自知。冇癮在,你不妨諗吓,自己辛辛苦苦打咗三個鐘文章,點擊率先得果30個人,而我係有接近8,000個Followers時,你諗吓有幾無奈?

對比好多「新入行」嘅朋友,其實自己已經算好彩,喺Social Media未變質前叫做立穩過陣腳,儲到咗你哋呢班「鐵粉」,今時今日你要有人睇唔係唔得,但FB好、IG好,甚至Blog也好,唔該「科水」先,要玩得更專?夠錢做埋SEO、SEM你一定掂架,只要有錢。

再三重申都仲係有人覺得我收咗錢、我係一間公司,希望真係承你貴言,我可以做得到一門事業。

有朋友話,我強在可以儲到一班「肯睇字」嘅讀者,今時今日,冇乜人做得到了。聽落好似有少少悲哀,都唔知對方係讚緊定笑緊我,但呢個習慣九年不變,希望繼續都係不變。

我唔排除有一日會剪片或者搞網台之類,我都想試吓,但真係太忙太多嘢搞,做多一壇依然係冇收入,大家講就易,正如我搞個talk,好多人都真係以為就咁pop一聲就彈出嚟,每做一壇嘢、一個改革背後要花嘅功夫都好大,我都要諗吓未來可以點發展落去。

講到玩改革,嚟緊呢一單,點可以唔講呢?

P.S. 呢個係當日嘅Cap圖,唔知你又搵唔搵到一個已消失嘅集體回憶記號?

 

【九週年的難忘時刻之(七)】

19143801_791159331054157_7444186058080561356_o

雖然尋日插完Faccebook,但對於好多朋友嚟講,認識「晞。觀影記事」,都好可能係因為Facebook Page。

自己唔係一個好追潮流嘅人,但經Sina起家,一直默默寫咗咁多年,開始覺得去到一個樽頸位,似乎要俾更多人睇到,喺當時真係要開個Page。果陣啱啱澳洲返嚟自己開咗個Page 有故事的旅人 / 迷.忘於澳洲360天,發現呢壇嘢Work、有得做喎,但要兼顧嘅嘢太多,我都好掙扎好唔好咁做;搞多一壇嘢,意即你花更多時間;以前check住blog點擊率,依然仲要睇埋Page嘅click rate,正所謂,一中Social Media毒,你好難出得返嚟。

結果,一開就四年。其實好矛盾嘅,今時今日Facebook係廢,但冇咗佢又唔得,而有時想share預告片、搞笑相、劇照等等,我又冇可能開一篇Blog去寫,而Facebook Page就做到好好嘅平台,都可以俾更多人睇到。雖然對比自己另一個Page,呢度Followers唔算多,但估你唔到,同一篇文,呢度Reach同Engagement都係果邊三至五倍,好多謝你哋,為我創造奇蹟。

Sina「紅底」人人皆知,好多嘢俾人「河蟹」之餘,後嚟輕到九彩,輕常寫完文又消失埋,大量spam搞搞震又冇人理,再加上當時決定將旅遊果邊文章合拼埋(原本我經營緊兩個Blog兩個Page,長遠落去真係會癲),於是轉場去Wordpress念頭就出咗嚟。

一個住咗七年幾嘅「家」,突然要搬去另一度,仲撈埋旅遊生活文章,未必人人接受得到,但唔試唔會知反應,最後掙扎咗超過半年,終於的起心肝去轉。開頭可能好多人唔鍾意,用唔慣都有好多Bugs,但買咗自己網域、版面又靚好多、穩定性好十萬倍,當然就繼續俾心機研究,好好用落去啦。而且,成功將電影同旅遊兩班讀者撈埋到,呢個網,抵開。

作為一個鍾意文字嘅人,我其實好拿憎IG搞到人智障化,識睇圖(仲要假圖)唔睇字,但與時並進,舊年我都決定開返啦。雖然,到今時今日都唔太識玩,反應都唔係好好,Like嘅亦都廣告account多於真人,我都係開住先,總會有用嘅。

介紹返,我IG係#travelerwithmovie

Online嘅幾個里程碑就係咁,最後,我都決定要走到Offline,做咗幾樣同讀者交流嘅事,試咗幾次後,終於做出我九年嚟最大最大嘅一次突破,呢幾個難忘嘅壓軸回憶,全賴有你哋支持,聽日再講。

 

【九週年的難忘時刻之(八)】

19388543_791729514330472_3428085192594704295_o

講到最後,我諗最大突破,就係搞咗幾單同讀者互動嘅事。

2014年,我第一次搞讀者電影票選,由讀者選出心水年度最愛電影,估唔到反應極好,係我第一次做嘅活動。

2015年,我當時去新加坡出Trip,嚟到Universal Studios,心諗不如搞吓送嘢,結果我真係真金白銀買幾樣禮物送俾大家(雖然係我最憎嘅Minions),再第一次試吓落ad(當然呢個係無底深淵),成功做咗第一次活動,之後再有抽飛、抽禮品等等,雖然搞到有「抽飛黨」問題,又有人冇飛嬲嬲豬屌我老母又話要起底又乜又物,果個係另一個故事了。引伸到落去年尾第二次搞讀者票選,將名單增加更多,雖然俾人哋笑我「小圈子」,咁又點?好過唔小圈子選出嚟冇代表性啦,托賴反應比前一年更好。

2016年,食住潮流,我試吓玩Live,正所謂 #睇人仆街最開心,做咗幾次Live,估唔到玩Universal Studios俾鬼追最高「收視」,玩開有癮,最後票選提名結果公佈都玩Live,估唔到有成千View,仲可以同大家傾吓計,我覺得都係時候要露面。

2017年,我終於做咗第一次分享會,可能好多人大隻講得個吹,但一個可以坐120人嘅場竟然全場滿座到要加位,即使第二次分享會做返同一個題目,都有超過50人參加,呢個反應,我係完全估唔到嘅。

做咁多嘢,好多時真係吃力不討好,你以為我收咗錢搞抽飛,其實我初頭係倒貼錢落ad、第一次分享會可能意料之外賺到少少,但第二次賺到果筆錢先剛剛好填到個場租。做呢一切背後付出咗好多好多,做一場電影票選Live,我背後用咗幾耐、寫咗幾多頁notes、點票用咗幾多時間,冇同大家講姐。

我點會唔知,今時今日社會入面,係認真便輸了,你認真做完一堆嘢,人哋可能覺得你傻仔,有付出冇收獲,甚至我寫完呢八篇文章,都唔係好多人睇得到,但係呢咁多年陪伴我成長嘅一切,有你哋嘅見證,我始終無悔自己付出咗咁多。

自己冇咩朋友,有啲咩興趣有啲咩故事,身邊冇乜人分享,好多謝你哋願意聽我做Live講廢話、願意無聊睇我行迪士尼、願意跟我玩法去做投票、願意睇咗我九年嚟幾千篇文。人生從來冇乜嘢係成功,唯有呢度,同你哋增加互動接觸,係我生命原動力之一。

有人提議過,今年電影票選不如租個場搞,如果嚟真,咁呢單嘢我十週年時真係要重點回顧喇哈哈!

 

更多資訊及文章,請Like Fb Page:
【有故事的旅人】

【晞。觀影記事】

IG請Follow:
#travelerwithmovie

廣告

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s