有朋友問我，你有冇後悔揀錯科？

讀書果陣，其實我真係唔知自己想做咩（依家都好似係），而果時鍾意睇戲，好簡單第一志願係揀電視電影，果陣心口一個勇字覺得理想可以當飯食。結果，我英文E咗，電影竟然唔收，都多得佢唔收，唔係我下半世應該完全改變。都好好彩，英文E咗，電影唔收，反而酒店管理收咗我，入讀咗一科好多人果時夢寐以求嘅學科，好似好風光。

讀酒店好似好專咁，但出到嚟就知道唔對路。依家情況據聞大有改善，但當年唔係咁。一來見工果陣已深明性別歧視問題幾嚴重，又或者講，易地而處俾我做阿頭，做得酒店梗係想請個靚女，大家一樣學歷又冇經驗，做乜要請條仔？二來，好荒謬地佢哋係想請有經驗嘅人，讀得Degree大部份都係得暑假實習，竟然比唔上非Degree畢業生，唔好講未來，第一步先輸。結果，我有同學都真係「由低做起」，大學畢業後做執房、做洗碗、做Bellboy－－都已經好好，我當年差唔多見盡全香港大部份酒店，冇一間請，見咗超過半年，最高紀錄一日見五份工，全部唔得，我信心盡失，曾經以為自己係咁先。

絕路時，走咗去做物業管理，果時覺得冇鬼用，依家諗返學到嘅人生經驗冇一份工俾到我，前途未必有，但唔係冇得著；其後有轉去做酒店，但都發現唔係咁啱自己。果時有人話，讀果科唔做果科，好嘥姐，我都有掙扎過，但我覺得香港做服務性行業，唔係病態，係變態，所以決定轉行。

到最後，其實我都唔係好多同學做返酒店。

讀酒店，讀果三年係辛苦，但係開心；你問我學唔學到嘢，我可以答你紙上談兵就有，講真課本係學唔到乜嘢；人生經驗就多，俾到我兩次人生中最開心嘅實習時光，都因為呢一科好多trip去，無形間，令我愛上旅行，有今日嘅我。諗返十年前，我唔係讀呢一科、唔係外國生活過、唔係同好多奇奇怪怪嘅外國人同無敵浪人做過拍檔，我識鬼Plan行程、除咗酒店之外識鬼有咁多住宿模式、知鬼道有樣嘢叫Working Holiday咩。

重點係發現，英文E咗一樣溝通得好好，英文A咗都唔代表你識同人溝通，外國人理得你有咩文法。

有睇我本書嘅朋友都會知，我一生中覺得讀酒店最有用嘅時候，係澳洲果年，唔係讀酒店，我做唔到幾份酒店工，我可能要乞食，都一定改變我成個行程，最少出唔到呢本書。人大咗，會愈嚟愈覺得：如果唔係點，最後就唔會點點點，有因必有果，每個抉擇都會導你去唔同路向；每樣嘢都有兩面，可能當日我讀咗電影，今日我做咗大導演，又可能仆得更直，後者機會大十倍。

有冇揀錯科，睇你點睇，重要係睇你之後揀嘅果條路。有人中學都未畢業，甚至有啲讀書時大家覺得呢啲人廢柴嚟，最後冇學位一樣做到飛黃騰達，有學位又唔見得係咩。畢業後咁多年，乜學位都係過眼雲煙啦。

大家在同一條起跑線上，我覺得睇都係睇際遇啦（當然有父幹又另作別論），有時你話冇葡萄又真係呃你嘅。去咗個聚會，有朋友當年讀唔成書，後尾做做吓搵得到，有錢又有樓，新年請成家人去郵輪玩都覺得冇咩問題、去酒店食返餐好都唔覺貴，而我仲喺度計緊邊間茶餐廳食下午茶平一蚊；唔好講得咁離地，有朋友覺得食餐日本嘢一人二三百蚊唔係好貴、食咪食囉，你問我間中一餐半餐可以接受，長期咁食法就唔得喇，但我總覺得地鐵站壽司連鎖店三蚊一舊壽司都貴；有人會去追名牌、追潮流，但我發現自己已經幾年冇買衫褲鞋襪；你堅持去旅行要最少都要搭國泰，我搭俄羅斯航空、hkexpress都要等佢跌價先買－－當然依家呢兩間一啲都唔平。你搵到，會覺得冇名牌、冇最新手機周身唔安落，但當你慳慣咗，你又覺得根本冇咩分別。

有位都係勇敢追夢嘅朋友同我呻，佢自己畢生積蓄，都唔及人哋一個月人工，覺得自己好冇用。我都經歷過呢段日子，完全明白呢種感覺，但馬死落地行，慳慣捱慣堅持慣，其實又唔會死嘅。你或者會話，不如試吓投資、炒股，但連個本都冇，又投咩資、炒咩股？

所以，揀咩科、讀咩科、成績係點，真係完全唔重要，最緊要係睇你揀果條路，咸豐年間嘅成績都無謂搬出嚟講啦；GPA過3爆4都係浮雲，睇都係睇際遇，自己點樣去面對呢個你自己嘅選擇。就算我當日唔係讀酒店、唔係讀電影，讀好多社會上鍾意、好渴求嘅科目，讀到上Master，到最後際遇唔得、自己唔鍾意，唔做喇，都可以一樣好霉。

這些年來，我深深明白，際遇真係好重要。

你未必經歷過畢生積蓄都唔夠人哋一個月人工嘅日子，都未必經歷過連稅都冇資格交嘅感覺，亦未必經歷過慳到為咗平幾毫子，要行幾個站搭巴士用分段收費嘅時光，又未必經歷過今日唔知聽日事唔敢亂洗錢嘅歲月… 呢一切我經歷過，又真係死唔去。

雖然人比人、比死人，我話冇葡萄就係呃你嘅，但最少我堅持過，他朝一日要認命，都對得住自己。

回答最初嘅問題，你問我後唔後悔，如果係啱啱畢業嘅我，一定會答你好後悔，因為當年搵唔到工兼受盡白眼嘅日子真係好難受，但到今日嘅我，唔敢講揀咗第科條路會唔會好行，正如我文初所講，如果我冇讀過酒店，就冇今日鍾意旅行嘅我。

我唔識得答你後唔後悔，只能夠話，呢個唔算係一個人生好錯誤嘅抉擇。

幾折墮都好，知道自己做緊乜就好。

【延伸閱讀】到底香港發生乜事：無才便是德？

【延伸閱讀】高薪厚職與低薪快樂的矛盾