事前分別喺「有故事的旅人」同「晞。觀影記事」兩個Page連載，見好多讀者問起，為方便閱讀，我將連載過嘅故事連埋做一段，分兩篇出。

警告：下文含有大量粗口，可能會引起閣下情緒極度不安，請讀者留意。

Story 1：

做咗幾年嘉年華，我深知道最恐怖唔係大陸人、唔係南亞人、唔係死纏難打嘅男女朋友，而係，怪獸家長。每個員工，大家都知道，最癲一定係家庭客，尋日同大家分享嘅東西文化價值觀，已經唔算得乜嘢，最癲係粗口橫飛嘅家長，甚至誇張者搞到細路仔女都會對住你講粗口。

話說有一日我做個booth唔係好穩，細路仔坐就勉強ok，企就一定要阻止。有個阿媽抱住個仔企咗上嚟啦，我就話：「小姐唔好意思，呢度小朋友唔企得，比較危險呀。」

佢：「嗯。」

唔理我。

我：「唔好意思，真係唔企得，呢個位唔穩架。」

阿媽：「我屌你老母，聽到喇知喇，你依家想點撚樣呀？仆你個臭街食屎大呀？你話我知你想點撚樣呀吓，我屌你老母！」

我：「冇，只係提返唔安全姐，一陣小朋友整親就唔好啦。」

阿媽：「我屌你老母呀，你邊位呀吓？我屌你老母呀！我個仔跌死又關你撚事呀吓？我屌你老母呀！」

我：「小姐，請留意返你言行，同埋如果小朋友唔落嚟，我唔可以俾你參加遊戲。」

阿媽：「我屌你老母！我依家唔撚玩呀！撚樣我依家要投訴你！」

我：「小姐，冇問題，呢個係我個名同員工編號，人事部直行轉左，你識唔識行？」

阿媽：「咩呀，你大鳩我呀？」

我：「唔係，如果你唔識行，我可以帶你去，但我冇咁早收工行唔開，你介唔介意等？」

阿媽：「我屌你老母呀！你依家玩我呀？好好笑呀？吓？你係咪耍鳩我呀？癡撚線！呢度呀，呃人架！唔俾人玩架！我投訴到上《東張西望》！（一路嗌一路走）」

喂呀做咩走姐，好悶呀，投訴我啦，我好鍾意人投訴我架，我好想食花生呀。

香港人乜都要面乜都要投訴，佢個仔喺咁環境成長，我真係恭喜你呀。

粗口橫飛都唔誇張，教埋仔女做神偷先至最癡線，下一單先真心嬲。

Story 2：

上一篇分享過，我哋最驚係家庭客，家長為咗贏咩都做得出，教仔女出術、辱罵我哋，完全印證香港人要贏在起跑線，為咗成功咩都做得出，呢個撐起香港嘅核心價值。

話說有家人個女勁百厭，無論我定我partner甚至我supervisor都已經叫咗佢咪搞我哋啲嘢，嚟到我已經好客氣話，唔好意思小朋友，唔好掂我哋裝飾品呀，好利架。

個老豆竟話：「同哥哥講，屌你，我係客，俾咗錢做咩都得。」

我唔知個女有冇講（返得多呢啲工，自知三歲細路粗口流利過三十歲），廢事理佢。後尾我已經聽到我partner狂小佢出術，又過界又反彈甚至搶旁邊個客個波。

當我諗住耍佢時，佢發爛詐：「喂冇心唔好俾啦，我俾咗錢，射中一個咪算囉（原本要中七個），俾隻公仔我個女有幾難呀，你哋唔係咁做生意呀？」

睇嚟我可以行入馬會講：「喂冇心唔好俾啦，我俾咗錢，劃咗張六合彩飛，俾一億我有幾難呀，你哋唔係咁做生意呀？」

我同佢抝咗好耐，到佢媽話：「仆你個街跟咩規矩呀？依家係咪唔俾呀？」

我堅定咁答：「係！」

然後頭也不回就走。

我聽到佢媽話：「阿女，哥哥睇唔到，快啲爬入去拎！」

哥哥睇唔到但聽到。

哥哥特登等阿女爬入嚟拎住隻公仔。

哥哥拎轉面大嗌：「小朋友呢度唔可以入嚟喎！阿小姐，你知唔知你咁樣做係偷嘢，我哋可以報警架？」

阿爸仲話：「車！隻公仔有幾貴呀？」
阿媽又話：「你依家恰我個女？」

我partner算係咁：「你即刻同我放低，我當冇事。」

我真係火都嚟埋：「做人父母教個女出術搶人嘢仲偷人嘢，你哋係咪覺得冇問題？我即刻可以報警，你係咪唔信？！你想唔想試吓？！」

個媽終於識淆，抱走個再掟返隻公仔俾我：「你老味依家我唔要呀！」

前幾年都偶有怪獸家長，都冇今年咁癲。睇得太多呢啲人，真心唔知香港未來會點。奉勸身邊有仔女嘅朋友，唔好咁樣教仔女。俾我知道，唔止睇你唔起，立即絕交。

Story 3：

上兩篇分享過啲故事係怪獸家長，但其實更恐怖係「魔童」。我唔知呢啲魔童係天生，定係俾家長影響，癲起上嚟都幾乞人憎。話說有個女仔行埋嚟亂掟，然後一喊就喊得出：「我今日生日呀，頭先甩手咋，俾返我呀嗚哇😭」

我：「你連續甩四次手？」

串親佢，佢走咗。

原來去班馬，淚水已冇。

佢老豆：俾我個女企上去啦！

我：「唔好意思，呢度唔企得上嚟。」

一來企上嚟太易中，二來反彈會食到正，而果個係棒球嚟，大佬，我喺入面做都俾你省過幾十次，我梗係知有幾痛。

老豆：「你老母就唔企得，我上次都企得，點解今次唔得。」

港豬拗唔過人，最叻搬權威（如警察、律師、東張西望？！）或者講上次都得。

你當我第一日出嚟行？我肯定咁答：「冇可能。」

老豆：「你老母就冇可能，細路都唔讓，正撚樣。」

我望住個女仔，衰啲咁講，你個女個胸仲大過棒球架，點睇都起碼十幾歲，仲扮細路？

喺我呢個撚樣未答佢時，佢已抱咗個女上嚟。十幾歲仲爸爸抱抱，獸父是這樣煉成的。

喺我未叫佢小心啲前，隔離個客成個棒球反彈撞到正一正。

嗚哇😭😭😭😭😭

呢獲堅喊。

老豆狂屌旁邊個客：「喂，你老母呀，我屌你老母呀仆街，你撼到我個女呀」，慘得過旁邊又係另一隻港豬，為攞獎全神貫注，完全唔知人哋屌緊佢，都唔知自己撞到人。

來生不做香港人是基本常識，一個唔覺意投錯胎，都唔好揀個將淘寶公仔，放得重要過你嘅老豆身上。

不過睇個女仔咁好戲，呢家人肯定係慣犯，而個老豆開口埋口「你老母」，相信個女仔冇老母，老豆好恨俾個老母佢。如果個家庭背景咁慘慘豬，唔怪得個女仔咁易喊啦。

Story 4：

話說我做個game係要入粒波落支槍，射跌啲樽，明顯不過，明顯到一個地步，我已經冇再解釋。

喺夜晚最忙時，有個我已經俾咗波佢嘅阿媽，明顯一睇就係港豬樣，大聲叫：「喂！！呢邊呀！！唔該！！喂！！屌你呀！！」

返得呢份工或者講所有服務性行業，真心「唔該」同心中講緊粗口嘅「唔該」，你係聽得出分別嘅。做完服務業，你會有同理心，當然明白去餐廳食飯係咁嗌唔該都冇人理你，好多時唔係佢唔想做，而係佢真係唔得閒。

「屌你！！！死仆街！！！」

我好明顯serve緊客，你屌多兩句我失聰更耐。終於，我擺明唔理佢超過五分鐘，得閒都要耍吓佢。

「你老味聾撚咗呀？仆街！」

「唔好意思，小姐，請問有咩幫到你？」

「射唔到呀！冇波呀！壞架！你咁撚樣都開俾我架屌你！」

我心諗，如果真係壞，你咪自己換過個枝囉。

最爆係，佢個女目測應該五六歲，對我舉中指，用好可愛聲線話：「屌你！」

香港未來充滿希望呀！

我望望佢籃波，四粒完整。

「小姐，你未入波喎。」

「你講乜撚呀？」

「你要入波，先至射到架」

「吓？唔係自動架？咩game嚟架？咁戇鳩嘅？」

「唔係自動架，所以先俾四個波你，洗唔洗我幫你入？」

「唔洗！屌你！我閪知你俾籃波我把撚咩？」然後同佢個女講：「你睇吓丫，呢度啲遊戲戇鳩鳩架！」又鬧返我轉頭：「你哋呢度好無聊囉，頭先玩槍我入完又要自己射，自動啦好心！」

旁邊好似有pair拍咗片，笑到gapgap聲。

如果有人見我上咗youtube，請話我知。

然後我同我partner講呢單嘢，大家成晚都係咁loop呢句：

「你個嘢壞咗呀！！！！！」

Story 5：

分享過幾個瘋狂的香港家庭後，其實外藉人士癲起上嚟都可以好恐怖，當中有呢位魔童，完全打破咗「怪獸家長」定律，直情係「怪獸兒子」！

話說有一日我做個飛鏢位，飛鏢位係好做，因為唔駛係咁執波，但變相最大問題係，你個位好危險，啲友一個唔覺意飛咗埋嚟真係會插中你，之前有同事直情插到要入醫院。

呢對外藉父子，個老豆掟十次都唔中，我見到呢個細路係咁尖叫，都怕咗佢，點知個仔兜巴升落老豆度：「You suck my dick! You sick my fucking dick!」

我見到都呆咗，叫佢calm down個鬼仔屌埋我：「You shut up! You fucking asshole.」

Well OK I shut up.

個老豆仲要對個仔講sorry。

個仔繼續暴走：「I said, you suck my fucking dick, right now! You fucking loser.」

個老豆又真係話：「OK later.」

最後，老豆玩到冇曬錢：「I am so sorry, no more, we are finished.」

個仔再兜巴升落去：「Shut up! You idiot! SHUT UP!!!」

睇住佢兩個嘅背景，我覺得好有愛。

目測個細路不大於七歲，可能佢有不老症，佢老豆根本唔係老豆，係ptbf。

怪獸家長香港人見到多，外藉人士真係好少見。

諗到佢哋suck嚟suck去個畫面，係愛定係責任？🤣

Story 6：

話說我果檔係送Marvel公仔，由於隻公仔實在太核突，所以你認唔出係乜，甚至認完之後決定唔要嘅都有。不過，我就唔係好明，點解咁多人玩之前，唔會先望下隻公仔想唔想要先至玩，玩完先話公仔咁核突發脾氣唔要？仲有，明明咁大隻字寫曬教你點玩，你又係都唔睇，係要問問問，問完覺得難玩又發脾氣？香港人係咪真係懶到咁？

如是者，呢位小朋友走到埋嚟，佢咩都冇問咩都冇睇，亂咁射就俾佢射中咗，好嘢喎，然後，佢老豆又明顯唔知人哋送乜公仔，甚至連Marvel係乜都冇概念，就俾佢個仔揀，而個仔相信都唔知咩係Marvel。

仔：「我要Batman！」
我：「唔好意思，我哋冇Batman喎！」
仔：「黑色果隻呀！」
我：「果隻黑豹嚟。」
仔：「咩係黑豹？咁呀… 咁我要超人！」
我：「er… 果個係美國隊長嚟…」
仔：「吓唔係超人呀，咁我要神奇女俠！」
我：「果個唔係神奇女俠嚟…」（佢指果隻係黑寡婦，雖然點睇都唔似黑寡婦）
仔：「咁呀… 我要自殺特攻果個！」
我：「果個蟻俠嚟… 小朋友我哋呢度全部Marvel公仔嚟架。」
仔：「吓又唔係呀，咁仲有咩呀… 丫！我要綠燈俠！」
嘩你連綠燈俠都識，我諗Ryan Reynolds聽到喊三聲。
我：「…………………………果隻變形俠醫嚟。」
爸：「點呀你揀極都錯嘅，你唔好扮識啲公仔喎，揀親都唔係嘅，等爸爸揀啦… 睇吓先… 俾隻閃電俠我丫唔該。」

我廢事再討論落去，循佢指住方向拎咗隻Iron man俾佢。

佢爸爸沾沾自喜：「爸爸一篤就篤中喇，你睇吓你丫，懶醒。」

Well.

#有邊讀邊有色睇色一定冇錯

Story 7：

承上回遇到一個連綠燈俠都講得出嘅DC迷，今次就遇上咗另一家都幾熟Marvel嘅客（其實Marvel公仔熟都好正常）。

一如我另一個page所講，香港或者講華人同西方家庭最大分別係，香港家長以贏為目標、西方家長以過程為目標；香港家長一早已經判定仔女輸硬，但西方家長會俾仔女自由發揮，有時見到啲細路都覺得佢哋好慘，包括呢一位。

媽：「俾個仔揀！阿仔你揀想要邊隻呀？」
仔：「我要黑豹」
媽：「咿，成隻黑色咁核突！」
仔：「咁我要美國隊長！」
爸：「意識不良呀！」
（我：？）。
媽：「個仔想要你咪俾佢要囉。」
（我拎咗隻美國隊長喺手）
爸：「唔……怪怪地。揀佢最想要啦！」
（我拎咗隻黑豹喺手）
媽：「Ironman啦，阿仔鐘意Ironman」
仔：「我要黑豹！」
爸：「喂蜘蛛俠得意啲呀，俾隻蜘蛛俠我啦」
我：「唔好意思冇曬蜘蛛俠喇。」

呢一樣唔抵幫，返嘉年華最衰係你掛曬啲公仔出嚟，但冇曬唔fill貨，迫啲客要其他冇人要公仔，呢樣有時真係玩死前線員工，俾人圍屌，將心比己我站在個客立場，我都會發火。所以，玩之前，記得先問清有乜。

有時玩前，如果有時間已經同個客講明暫時咩獎冇曬咩公仔，班友會話：「屌，我中咗先算啦。」然後其實冇聽，到佢真係中咗就發脾氣話點解你唔講。

呢家人俾錢前已經係咁話要蜘蛛俠，如果講到咁肯定，我一定戴頭盔先同佢講，一來費事佢事後發癲，二來唔玩我做少個客。

爸：「我屌你呀？！依家先話冇？！」
我：「頭先你俾錢前我已講咗，個個客人都咁講」
爸：「我聽唔撚到呀！我有冇答你聽到呀？吓？冇丫嗎！總之你同我死隻蜘蛛俠出嚟！」
仔：「唔要呀我要黑豹呀！😭」
爸：「你收聲啦，大人講嘢細路仔唔准嘈！」
媽：「你咪俾佢囉，今日生日呀佢，咪恰細路啦！」

我心諗今日有廿個人話自己生日，港豬係咪覺得我會信？一如我另外Page分享個勁好戲小妹妹，又話生日又喊曬咁，唔通我又會信？就算你真係生日，大曬呀？我全部公仔俾曬你生日快樂呀好冇？

媽：「咁你依家俾唔俾呀？冇咪拆display囉！」
我：「真係唔拆得呀唔好意思。」
爸：「我屌你呀！依家我個仔要蜘蛛俠你俾唔俾！」
仔（大喊）：「我唔要蜘蛛俠，我要黑豹呀！嗚哇！😭」

喺香港地，你面皮夠厚夠堅持，冇嘢唔得。我唔洗問都知supervisor廢事煩，一定開箱俾。

爸：「屌！都話有啦！」
仔：「我要黑豹呀唔要蜘蛛俠呀！唔制呀！😭」
媽：「你細路仔識咩丫，放放下你就鍾意啦！」
仔：「我唔要呀！俾黑豹我呀！😭」
媽：「好啦好啦，乖呀吓，你喊完就鍾意喇」

個仔唔理佢暴走咗。

呢家人好似極端咗，但其實大部份阿爸阿媽都係對個細路假民主、袋住先，就算有得俾個細路揀，果兩隻都係阿爸阿媽鍾意果兩隻，聽得多都覺得啲細路好慘。

有得揀你真係唔揀？似乎都係香港由細到大建成社會核心價值。

【延伸閱讀】回到嘉年華：從「玩」的一件事上，看盡東西家庭大不同