由《李屍朝鮮》睇到《屍戰朝鮮》(第一、二季):似睇戲多過睇劇

終於一嘗一日煲一季劇,再由《李屍朝鮮》睇到變成《屍戰朝鮮》,Netflix個「下一集」設計好邪惡。真心呢套嘢我係當電影唔係當劇睇,由第一季嘅圍城、稻田戰(稻田果場超靚),到第二季嘅「三年前回憶」、重頭大戰,鏡頭調度、畫面美感同場面氣勢,根本就係套電影嚟。一般睇劇,點都要有時間鋪排下人物角色同支節,但呢套劇由第一季一路殺到落第二季,簡直係一氣呵成,即使第二季中段有少少變咗宮鬥劇,都完全唔覺悶。

喪屍片甚至喪屍劇都有好多,用古代出發已經夠新鮮,當中喪屍(劇中叫怪物/瘟疫)嘅弱點、點樣攻敵,喺冇現代用機關槍下下爆頭時,絕對係個好新鮮嘅玩法,雖然個人覺得點樣「醫瘟疫」方法好似牽強咗少少,都無礙可觀性。

一班主要角色,個個人物個性鮮明,過程都係會牽動人心,為佢哋嘅下場而緊張,呢一點《Walking Dead》之後愈搞愈亂就做唔到,而班角色嘅背景都「應瞞得瞞」,鋪得到應有嘅懸念落下季,第二季大結局最後果十分鐘睇到屏息。時勢造英雄,睇住個開頭疑似廢廢地落難王子,慢慢變成個有血有肉真英雄,呢個過程都鋪得唔錯。頭兩季個人覺得要一齊睇,第二季最後一集疑似可以獨立完事,又鋪出新花款,期待可以點樣玩。

 

文字工作者也得要吃飯,你的支持是我寫下去的原動力。請給點心意,給小弟走更遠的路,寫更多好文章,歡迎透過payme以下連結或QR Code課金以作支持:payme.hsbc/jackyhei
75486099_723429001505181_3402665167123644416_n
同時,你也可透過Paypal捐款:paypal.me/jackyhei


瘟疫從來唔係天災係人禍,當權者一個決定可以拯救萬民,同時一個決定都可以將百姓置於深海,成為自己鞏權工具。大家講到同武漢肺炎扯上關係係如有雷同,但相信林奠都有認真參考過中殿娘娘嘅行事同處理手法,仲有個笑容,攬炒之母完美演繹。

又,演中殿娘娘果位妹妹金慧峻寒氣迫人,原來係青龍獎最佳新演員。

金成圭由《犯罪都市》《惡霸.魔警.殺人狂》,演癲佬演到出神入化,印象中第一次睇佢演好人(暫時應該係),但都要係一個癲嘅好人,型到呢。

柳承龍同陳善奎喺《炸雞特攻隊》一齊扮傻仔(前者仲有戇爸的禮物》),呢套嘢入面一忠一奸,正正經經完全係兩個style,尤其前者演得好入骨。

裴斗娜同「隔離果套熱門劇」嘅孫藝珍(真)一樣,點解可以冇老過咁。

個人覺得第一季係爽過第二季,睇返第一季導演原來係《黑仔刑警》《活埋35夜》果位金成勳。第二季係唔差,只不過珠玉在前差咗少少囉。

最後一個鏡頭,全民劇透,首播當日已經知道曬咩事,依然好震撼!第三季可以點玩?

 

最後機會

小弟執筆之原創小說已賣剩最後一批,售完即止,請即訂購:http://bit.ly/2PKXYFA

 

台灣書局兼網上平台亦已上架,可去文中連結購買:goo.gl/xzCymP

 

更多資訊及文章,請Like Fb Page:
【有故事的旅人】
【晞。觀影記事】

 

IG請Follow:
#travelerwithmovie

廣告

發表迴響