Subscribe網址：https://www.patreon.com/travelerwithmovie
早排同大家講過，我打算開個Patreon，一個付款會員機制嘅平台。其實依家好多Blogger都有用，我一直想整，但諗唔到可以寫啲咩額外嘢，直至最近所發生嘅事，我真係覺得Facebook同IG隨時突然一起身就404 error，你儲再多個Follower都係多餘，加埋如果大家記得，我舊年有半個月Facebook曾經死咗出唔到嘢，不如開定個後路。
我明白一玩付款制，哪怕你一個月收得好少錢，應該都會冇咗一（大）班讀者，所以我影評文章、呢度嘅電影新聞同抽水post等等，我都會保留，直至有一日Facebook收咗皮，目前諗嘅係，我想Patreon深入多少少。
Patreon付款版，初步諗想做幾樣嘢。首先，有樣依一刻未必好啱做，但將來「回復正常」時就啱做，就係「每週睇乜好」。如果你記得，以前我做網台都有類似做法。一直都不時有讀者問我最近有乜好睇，我明白好多人懶搵返我文章，不如每星期做個小總結分享吓睇乜好、有乜中伏，因為付款機制，我講嘢應該會更大膽😂。當然，如今冇乜戲睇，呢個欄目可能未必收到應有效果，可能寫吓Netflix或雙週一次，但如果「正常」時期，每每去到三月或十一月呢類「電影節月」，一星期隨時有15套戲同時上映，呢個精華版都係我想做嘅。同埋，我開始研究緊玩「大數據」，都想分享吓最近讀者朋友感興趣嘅電影新聞同新戲係乜。
另外，依家好多電影新聞，其實我都有少少深入嘢或個人觀感想分享，但衰啲講句，喺Facebook玩法下，我寫完冇兩日就冇咗、甚至寫完都reach唔到你，試過好有心機寫完其實都冇乜人睇到，所以平時都係好general咁寫，甚至直接翻譯外媒新聞。
如果唔係玩開social media讀者，我諗大家感覺都係，習慣咗有得睇咪睇，唔知道作為Content provider，有時係冇癮嘅。唔同Blog我起碼都有得做SEO，插Google ad都叫做有少少收入，用Facebook出post，我所有內容只不過係幫Facebook打工、所有內容都係俾Facebook攞咗，而我係唔會有直接收入。當然，Facebook幫我儲到嘅讀者，喺包場呢一類活動時間，幫到好大忙，但平時真係白寫，尤其是我變咗生活一部份，每日有4-5個post。成日有人以為我係一間公司有條team，甚至有公司r廣告時以為我係網媒，但其實我得一個人，冇收入。
所以，都係時候開發多樣嘢，就睇吓大家覺得我值唔值喇🙈
當然，好矛盾咁講，喺呢個時候，依然係Facebook接觸面最廣、涉獵到最多嘅讀者，如果我冇Facebook，我場包場都應該宣傳唔到，所以我呢度、IG、Blog都會照舊，只不過想開多個場，寫多少少其他內容，甚或是如果你想單純定期課金支持嘅，都無任歡迎。
唔會呃你，目前入面只有一篇測試文章，宣傳定先，我呢幾日會開始試吓放獨家內容，睇吓反應如何，再諗諗點樣發大嚟玩。
試睇價$5一個月，學慈善機構廣告話齋，請伸出你嘅援手，用你飲一杯咖啡價錢，就可以幫助到窮困小弟，等佢重拾希望；至於尊貴版內容，其實我諗唔到有咩太大分別，如果有人subscribe嘅，我將原文搬到俾你ad-free咁睇又點話。純粹如果你覺得我值呢個價，我會好多謝你。試睇階段我只會放電影文章， 有故事的旅人 （澳洲首都不是悉尼） 文章暫時唔會放住，試行一排先。
Subscribe網址：https://www.patreon.com/travelerwithmovie
