上一篇講到見工唔俾地址，都仲有另一個奇遇故事。喺疫情初期，有份工打嚟叫我見，又係唔俾地址我，得個名要我自己搵。我有少少不爽，但「見工唔肯俾地址要你自己搵」呢樣嘢，我諗都係半個行規，一定唔係留難你，係考驗嚟！諗返以前九成工都唔肯俾地址，要你自己搵，依家好似好咗。
當你試過好多伏工，加埋今時今日見工已經變上去傳銷、sell保險時，我已經好alert，上網用佢個名搵到好多奇奇怪怪嘅嘢，篤入去直頭我防毒係咁響。我打返俾佢問，係咪呢個地址，佢又夠膽死話：呀，呢個係錯架，好多人都會搵錯果間公司，然後俾第個地址我，咁點解你唔一早俾？
咁騎呢我當然又Google下，發現個地址根本就唔係呢間公司個名，以我過往經驗，伏味特濃，就打返去問佢，果個人尷尷尬尬話：er… 丫係呀，果個唔係我哋地址嚟，我俾過個你。
吓，你啱啱俾我架喎？
嘩，伏味極濃！
原本約我兩點上去佢office見，我又抱住以身試伏精神去玩吓，點知佢朝早話，佢哋公司突然WFH，所以兩點鐘用zoom見。
「突然WFH」呢單嘢，喺疫情初期嚟講，當時覺得唔止伏味極濃，直頭有生命危險咁，但算啦唔駛出去。
臨到兩點，佢又話佢老細突然有會要開，改做三點得唔得，冇話唔得嘅，zoom姐。
去到三點我入埋佢條zoom link又同我講，到佢突然有第二個會要開，改三點半得唔得，都冇話唔得嘅。
去到三點半我再入去條zoom link，佢直接打俾我話，到佢老細同佢要見客，改五點啦。今次冇問我得唔得。
你要開會要見客要改時間我明白，但係你可唔可以唔好到果一分鐘先同人講？
其實有心要改真係冇話唔得，但既然我只係諗住「以身試伏」冇打算做，俾你玩咗我咁多次，我又唔想你話得就得，唔好搞到自己咁犯賤。
我話「吓？五點我唔得喇唔好意思。」
佢問「點解唔得呀」
我話「我之後有嘢做」
佢問「你有咩做呀，你都冇工開架啦？」
（關你鬼事咩）我話「總之有私人嘢做，之後唔得喇」
佢問「咁五點唔得，五點三得唔得？」
…..?!
我話「其實我今日到夜晚都唔得架喇，不如聽日啦」
文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過以下QR Code課金以作支持：
同時，你也可透過Payme link：https://payme.hsbc/jackyhei
或Paypal捐款：paypal.me/jackyhei
佢好尷尬咁：「唉… 但… 死啦，我哋好急住等人用，想今日見，如果ok的話想盡快俾offer你，聽日見可能比較輸蝕，丫，同埋我聽日都唔係好得閒。」
原來係咁。
我忍唔住話「如果你哋咁急，就唔好同我一改再改啦！」
佢e e er er「唉，咁呀，咁我再諗吓點啦… 你五點三唔得，一係五點半得唔得？」
（丫你仲要問喎）我話「都話咗今日唔得囉」
到底依家啲人可唔可以俾返少少責任心？叫你上去見工，你遲一分鐘都黑你面，佢就可以叫你朝早上去，你食埋個lunch等三個鐘都未見得到，好喇，到依家有咗zoom，你就覺得對方可以隨時ready、喺街即開mon同你傾。
真心，「求職」唔代表我要「求」你囉。
【延伸閱讀】見工奇遇記（Part 8）：家陣見工定見血？！
✨電影網店現已開幕，多款電影海報、電影精品低至$5起，快啲嚟睇啦：https://bit.ly/3qLPkpk✨
「晞。觀影記事」Patreon加強版已經開幕，精選深度獨家電影文章，請即按此訂閱！
感謝各位支持，小弟執筆之原創小說，私人貨存已全部售罄，有意者繼續可到此文章內的連結購買！
更多資訊及文章，請Like Fb Page：
【有故事的旅人】
【晞。觀影記事】
MeWe: travelerwithmovie
