同大家分享咗19篇見工面試嘅奇事，有搞笑有令你火都嚟埋，正宗係19個「濕鳩」經歷。但係，「奇」嘅事，都可以係帶窩心同唏噓；見工遇到嘅奇事，都唔一定係見你果個仆街，同路人都一樣「奇」中有愛。呢一次就好深刻。
曾經覺得自己次次都見幾百份工好誇張，但係見得多同路人，自會發現呢一行好正常，你亦都唔止係唯一一個，比你見得更多嘅大有人在。話說，我有一次正準備去見間連名都唔記得係咩嘅公司時，有個人出電梯好熟面口：「喂又係你呀師兄？」
見得多工，你會發現來來去去都係同一班人，見完一份喺第度撞返唔出奇，尤其是出現「Group in」，呢位大頭肥仔，我已經撞過佢幾次。
我：「係呀，你唔係又同我見同一間公司呀？」
大頭肥仔：「屌，XX公司丫嗎，一樣啦，呢棟大廈全部公司都見曬，差呢間，睇你個衰樣都差唔多啦。」
呢座大廈我的確嚟見過唔止一次，但未至於見曬地步，大頭肥仔好似好熟路咁：「呢間新開架，Jobsdb未見過，喂好耐冇見你咁喎？」
「我早排有份工呀，做咗兩個幾月俾人鬥走咗，再去陣旅行，最近先搵返工。」
大頭肥仔好似好羨慕咁：「嘩，兩個月，有兩個月錢我捱到半年喇。」
記得幾個月前遇到幾次大頭肥仔，佢已經搵咗大半年工，身世同我差唔多，都係離不開「被動革扯」，我都有啲尷尬：「你… 一直都未搵到過一份工？」
大頭肥仔：「冇啦，都係咁，繼續見工Tour，就嚟一年喇，見咗六百幾份工。」
我冇數，我諗自己都係三百幾，未過四百，但呢啲數字，似乎係我哋先會明，人哋聽落覺得你癡線：「六百幾份差唔多啦，但你夠頂？呢幾個月冇其他job？」
大頭肥仔都係行家嚟，之前已經呻過「接job冇人工」，佢即刻著咗：「屌，咪又係叫你出十幾篇文，盛惠五百蚊果啲囉，我冇接呀。唉，依家問friend借錢咋，唔係邊有錢搭車見工。好荒謬呀，借錢見工！」
「唉。」我明，我點會唔明，好快到我。
大頭肥仔：「唉咩丫，我晨早睇化咗，你都應該睇化啦，唔止你一個，都有其他行家成日撞到，都係一樣搵唔到，唔駛驚喎，唔係得我哋咁。有時，我覺得見工見到係生活一部份喇，突然冇工見，周身唔自在，但你明知去見完都唔會請。」
再一次我明，我點會唔明。佢繼續：「其實我都開始見到重覆，我都唔明，同一間公司半年前半年後都出同一個post，到底佢哋有冇請過人？」
我：「嘩你連呢啲都見，明知伏架喎，我記得曬邊間打邊間啦。」
大頭肥仔講咗句最絕望真相：「當你知道全香港所有公司都俾你見曬，而你都冇人請時，唔翻兜仲可以點？」
如果係旁人，應該會講「轉行啦你」，但我深深明白，轉到我唔想轉咩、有頭髮邊個想做癩痢，有得見先得架，我只能說句：「加油啦。」
文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過以下QR Code課金以作支持：
同時，你也可透過Payme link：https://payme.hsbc/jackyhei
或Paypal捐款：paypal.me/jackyhei
大頭肥仔拍拍我膊頭：「點呀，下一場邊度？」一般嚟講，只有電影節撞到影迷朋友，先會問「下一場邊度睇」，但呢位同路人所講當然明白：「下一場都係附近，對面街囉，之後就返荔枝角。」
大頭肥仔話：「有三份好丫，我今日得兩份咋，下一份灣仔。」
大家相視而笑，我都唔知講咩好：「祝你好運啦… 唉，唔好見咁多工啦。」講出嚟好似好荒謬，但真心，我覺得係咁見好嘥時間，冇乜嘢都未必去，反正間間都咁上下。大頭肥仔話：「咪當環遊香港囉，我問朋友借咗三萬幾蚊，應該夠我洗半年喇，慢慢嚟囉。Anyway我要趕過海喇。Good luck bro，有緣希望搵日出嚟飲杯嘢啦，希望唔好商業大廈工廠大廈見喇。」
可能因為呢啲緣份，大家都覺得唔見好過再見，同呢位大頭肥仔遇過四五次，都唔記得問佢咩名。
大頭肥仔臨走：「by the way，呢間都係伏嘅，不過一場嚟到咪上去吹吓水囉，唔好太認真。」大家見得太多工，對「伏」嘅定義都差唔多，我唔可以話呢間伏，但都係果啲嘢啦。
如今，我脫離到呢種「見工Tour」生活，諗返果段日子所經歷嘅一切，依然一生難忘。以前成日有人問，點解你唔轉行？係咪你唔努力搵工？係咪你自己冇料咋？搵唔到工咪去進修下囉，你唔係讀書都冇錢呀？馬死落地行，壓價一萬都做住先啦、見工玩到要見血？考驗嚟姐，咪試吓囉。易地而處，你哋又係咪講得咁輕鬆？
冇經歷過人生低潮，你永遠唔會明白；唯獨是經歷過嘅同路人，見面總有種「在心中」嘅唏噓。唔知呢位大頭肥仔，今日還好嗎？
最搞笑都係「唔俾地址你見工」，成班人好似玩treasure hunt咁搵公司大門，試過次遇到個搵到地址嘅人見到我，直接教我點上去。大家搵得多伏工，去到呢個位，叫你上去見，都唔知係想你死，定係互相關照喇。
【延伸閱讀】見工奇遇記（Part 19）：如果搭直昇機返工，做乜你仲要嚟見工
✨電影網店現已開幕，多款電影海報、電影精品低至$5起，快啲嚟睇啦：https://bit.ly/3qLPkpk✨
「晞。觀影記事」Patreon加強版已經開幕，精選深度獨家電影文章，請即按此訂閱！
感謝各位支持，小弟執筆之原創小說，私人貨存已全部售罄，有意者繼續可到此文章內的連結購買！
更多資訊及文章，請Like Fb Page：
【有故事的旅人】
【晞。觀影記事】
MeWe: travelerwithmovie
