尋日有讀者講起買就過期食物經驗，我都想分享下。
就過期食物當然日日買，有時唔係買，尤其Backpacker集中地如Hostel或working hostel附近，『就過期食物』係要搶嘅。如果你住過偏遠地方得IGA，我諗你更加明我講乜。
隔咗幾年，我唔知Cairns W記依家點，但幾年前，佢每個周末唔記得三定四點，就會推出一堆爛蔬果出嚟。之前我都唔知，係突然見有成班backpacker捕住，有一陣騷動先知。3蚊一袋任裝。
想當年，我住Port Douglas，兩星期出嚟一次買餸（其實係行街），為著自己同一班窮L幾乎打交搶到一袋3蚊爛蔬果而興奮；返到屋企見到有一粒士多啤梨冇爛，直頭要還神。呢3蚊爛嘢，切頭切尾，我一個人可以食到兩星期。
喺呢度，我學識咩叫知足、咩叫珍惜。
如果大家試過，一定會明。去得working holiday，人人有不同價值觀，的確一星期等於香港一個月人工唔難，但你永遠唔知自己幾時俾人炒，你可以大魚大肉，我選擇慳得就慳。
食你唔死仲爆發到無窮煮食創意，由今日有咩就過期嘢爛嘢再加執到咩free food，煮出嚟嘅創意料理隨時好食過新鮮食材，都一定好過食即食麵，成功嚕，成功感、學到嘢咪係你自己。
講笑自嘲就話行乞，其實我好懷念當日嘅死慳生活，冇呢種習慣，點完成環澳夢丫？而且，返到香港學識應洗則洗，呢種生活習慣，對窮到只剩下錢嘅香港人，你可能係異類，但得著同人生經驗係你嘅，唔係下下要寫到落cv先係經驗，今日回首，果段日子依然係我無悔青春。
【延伸閱讀】我在窮遊練習到的「本能」
【延伸閱讀】終極旅人慳錢大法，你做唔做到？
如欲看更多資訊及文章，請即Like【晞。觀影記事】及【有故事的旅人】專頁！
全新IG請Follow：#travelerwithmovie
