英文片名：American Factory
今年奧斯卡最佳紀錄長片，坦白講一定冇舊年得主《赤手登峰》咁正，就真係套普普通通嘅紀錄片，用個帶有少少獵奇、「花生」嘅角度，去睇間中資美國工廠嘅生活日常。套戲攞獎就話有政治因素，睇時反而覺得係講跨國企業下嘅文化差異，點樣令一間公司產生種種矛盾，到最後都係欺壓最下層嘅勞工。
如果有喺外國生活兼工作過，大概都會好明白戲入面嘅道理：亞洲人做嘢永遠快手好多、西方人會慢好多，甚至不在狀態。或者係亞洲人習慣咗「快」都習慣咗有種「奴性」，但西方人本身就有自己一套生活態度，做嘢係慢啲，冇話對或錯，但喺人哋眼中就覺得你班「Fucking Asian」唔知搏乜、有心玩嘢，咁就有問題喇。
呢間工廠個總裁，一睇就知係個有錢但冇common sense，兼且覺得自己有錢就好威威嘅大陸佬，一行出嚟個樣已經財大氣粗、狗眼看人低，相信大家都唔會有咩好感覺。佢唔俾搞工會、跟住佢班人仲要人星期六日返去OT、因工受傷冇保障仲要炒埋佢，然後仲大條道理覺得冇錯。我注資入嚟係救你班美國小鎮死窮L，你多謝我都嚟唔切啦－－等同於今時今日無數公司睇死你班契弟唔敢走，我有份工俾你「共渡時艱」，你執到啦，減薪凍薪玩謝你都仲得呀－－睇時你會替班美國員工好不值，生活去到絕境，以為有個希望，點知原來係更不堪嘅惡夢，但係要供車供樓、仔細老婆嫩，可以點？你睇我好，我睇你好，以為美國人生活好好，絕境時都同你同我一樣咁悲哀。
跨國文化下，好多嘢變成自動化、有錢就可以權傾一方，低下階層唔受保障，理得你係白人黑人定黃人，世界一體化，某程度上係好事，同時都係將好多不良嘅生活態度擴展到其他地區。睇住一班美國勞工爭取緊好啲工作環境、好嘅工時，而你班中國人甘心做到冇停手，lunch都唔食就咁咬兩啖蛋糕就算；當人哋爭取緊安全工作環境，你哋徒手執玻璃都冇怨言，下層奴性之高，上層自視過高，有時唔怪得我哋去到外國會俾人叫「Fucking Asian」－－我曾經俾人叫到當say hello咁，可以點樣收佢皮，可睇留言連結篇文。
《美國工廠》我唔會話非看不可、好似舊年嘅《赤手登峰》咁好睇，不過有時間，都不妨係kill time之選。
文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過payme以下連結或QR Code課金以作支持：payme.hsbc/jackyhei
同時，你也可透過Paypal捐款：paypal.me/jackyhei
感謝各位支持，小弟執筆之原創小說，私人貨存已全部售罄，有意者繼續可到此文章內的連結購買！
更多資訊及文章，請Like Fb Page：
【有故事的旅人】
【晞。觀影記事】
IG請Follow：
#travelerwithmovie
