復仇聚會：好耐冇睇過一套睇完嬲到震嘅戲

睇文前留意喇！

「晞。觀影記事」Patreon加強版已經開幕，精選深度獨家電影文章，請即訂閱：https://bit.ly/2TS6BiE

英文片名：The Invitation

成日間唔中都會有文章，推薦Netflix必睇遺珠、十大不能不看電影乜乜物物，呢套《復仇聚會》（The Invitation）必會榜上有名。見咗好多次，喺某個心情極差嘅夜晚開嚟睇，以為係勁嘢，點知伏到震，講緊可以話係人生睇過最伏嘅戲之一，係睇完會嬲果隻。

故事講一班朋友聚會，主人家係男主角嘅前妻，氣氛愈搞愈奇怪，以為係男主角諗多咗，點知背後另有陰謀。一班朋友圍埋一齊食飯，食食吓食出事嘅戲，精彩者可以拍到《完美謊情》或《彗星來的那一夜》，點知呢套《復仇聚會》，或者係Netflix中文譯名極有誤導成份，成件事同「復仇」無關，男女主角係咪前妻前夫身份都冇乜關係，成套嘢衰啲講，真係喺度就咁「鳩噏」。

套戲片長100分鐘，我分開咗兩晚睇，事關頭果80分鐘係一班人冇point咁吹水，吹到一個地步離題萬丈，完全冇內容可言、彼此人物都係毫無個性，我甚至懷疑套戲到底有冇劇本，係咪就咁叫一班人自行吹水。男主角好似好抽離成件事，睇到你極為壓抑，但無論最終係咪「諗多咗」，頭大半套戲極考你耐性。果堆唔係伏線、唔係鋪排，睇完成套戲都唔覺得呢堆無厘頭對話有乜作用。如果純粹想安排個creepy嘅背景，講真呢堆對話20分鐘已經可以入正題，佢用咗足足80分鐘。

最後果20分鐘「爆大鑊」只係叫做有返少少睇頭，對比同類電影，都係好弱雞，我諗你睇時都約略估到係咁收場，而你鋪咗80分鐘都鋪唔到嘢，突然間話爆就爆，難睇程度堅係尷尬到冇眼睇。

好少可有一套戲悶到中途停咗睇唔到落去，但又因為花生佢到底做緊乜，堅持隔一日再睇埋落去，點知嘥咗人生100分鐘。唔明點解呢套嘢俾人力推做Netflix必睇之作，上返imdb睇評價，似乎好多人都同我一樣有相同諗法，俾呢堆文章昆咗，結果悶到頂唔順。

睇返導演往績，原來佢係拍《陰點鬼情人》同《倩影刺客》果位Karyn Kusama，「伏」得有理，之後據聞仲會執導「Dark Universe」德古拉伯爵嘅Reboot版，真係聽到都驚。

文字工作者也得要吃飯，你的支持是我寫下去的原動力。請給點心意，給小弟走更遠的路，寫更多好文章，歡迎透過payme以下連結或QR Code課金以作支持：https://payme.hsbc/jackyhei

同時，你也可透過Paypal捐款：paypal.me/jackyhei